अमेरिकामा स्वास्थ्यकर्मीहरुले तुरुन्तै वर्क परमिट नविकरणका लागि अनुरोध गर्नसक्ने
प्रकाशित मिति : पुस १३, २०७८ मंगलबार
अमेरिकामा स्वास्थ्यकर्मीका रुपमा काम गरिरहेकाहरुले तुरुन्त वर्क परमिट नविकरणका लागि अनुरोध गर्नसक्ने भएका छन् । तत्कालैदेखि लागु हुनेगरी युएससीआईएसले स्वास्थ्यकर्मीहरुका लागि यो सुविधा ल्याएको हो ।
वर्क परमिट नविकरणको आवेदन पेन्डिङ अवस्थामा रहेकाहरुले शीघ्र निर्णयका लागि अनुरोध गर्नसक्ने सुविधा ल्याइएको हो । वर्क परमिट ३० दिन वा त्योभन्दा कम समयमा एक्सपायर हुन लागेका वा पहिले नै एक्सपायर भइसकेकाहरुले शीघ्र निर्णयका लागि अनुरोध गर्नसक्नेछन् ।
कतिपय वर्क परमिट नविकरणमा युएससीआईएसले झण्डै १ बर्ष समेत लगाउन थालेपछि कैयन व्यक्ति बीचमा वर्क परमिट नभई कामविहिन हुने खतरा समेत रहेको छ । खासगरी एसाइलम आवेदकको वर्क परमिट नविकरणमा भइरहेको ढिलाइका कारण थपिएको ६ महिनाको अवधिमा समेत वर्क परमिट नविकरण नहुँदा समस्या हुने गरेको छ ।
अदालतले युएससीआईएसलाई वर्क परमिटबारे छिटो निर्णयका लागि आदेश दिन अस्वीकार गरेको अवस्थामा युएससीआईसले स्वास्थ्यकर्मीहरुलाई लक्ष्यीत गरेर नयाँ सुविधा ल्याएको छ । शीघ्र वर्क परमिटको अनुरोध गर्नेहरुले आफ्नो पेशाको वा अहिले स्वास्थ्यकर्मीका रुपमा काम गरेको प्रमाण पेश गर्नुपर्नेछ ।
यदि उचित प्रमाणहरु प्राप्त नभएको खण्डमा शीघ्र निर्णय नदिइने युएससीआईएसले जनाएको छ । यसरी अनुरोध भएका आवेदनमा छिटो निर्णय दिने बताएपछि कतिदिनभित्र निर्णय दिने भन्नेबारे युएससीआईसले केही उल्लेख गरेको छैन ।
शीघ्र निर्णयको अनुरोध गर्नका लागि युएससीआईएसको सम्पर्क केन्द्रमा ८०० ३७५ ५२८३ मा फोन सम्पर्क गर्नुपर्नेछ । आफू योग्य स्वास्थ्यकर्मी भए नभएको थाहा पाउन यहाँ क्लीक गर्नुहोला ।