पार्टीले पहिलेभन्दा कम जितेपछि बेलायती प्रधानमन्त्रीको भविश्य संकटमा
प्रकाशित मिति : जेष्ठ २६, २०७४ शुक्रबार
चुनावमा अपेक्षित परिणाम आउन नसकेर पहिले भन्दा पनि स्थीति खराब बनेपछि बेलायती प्रधानमन्त्री टरिजा मेको भविश्य संकटमा देखिएको छ । बिहिबारको चुनावमा मेको कन्जर्भेटिभ पार्टीले संसदमा बहुमत गुमाएपछि मेको राजनीतिक भविश्यमा नै प्रश्नचिन्ह खडा भएको हो ।
संसदमा स्पष्ट बहुमतका लागि ३२६ सिटमा विजय हासिल गर्नुपर्ने भएपनि मेको पार्टीले पहिलेभन्दा १२ सिट कम ल्याएको छ । यसअगाडि मेको पार्टीले संसदमा बहुमत अर्थात् ३३० सिट कायम गरिरहेको थियो ।
यद्यपी नयाँ चुनावी परिणामपछि पनि मेको कन्जरर्भेटिभ पार्टी बेलायतको सबैभन्दा ठूलो दलको रुपमा नै रहेको छ । यसैबीच मे ले बेलायतको डेमोक्रेटिक युनियोनिस्ट पार्टीसँग मिलेर सरकार गठन गर्ने बताएकी छिन् । यो पार्टीले १० सिट ल्याएको छ । डेमोक्रेटिक युनियोनिस्ट पार्टीसँग मिल्दा सरकार गठनका लागि ३३२ सिट प्राप्त हुनेछ ।
यसैबीच लेबर दलका नेता जेरेमी कोर्बिनले मतपरिणामप्रति गर्व लागेको भन्दै प्रधानमन्त्री मे ले जनताको सच्चा प्रतिनिधित्व गर्ने सरकारका निम्ति बाटो छाडिदिनुपर्ने प्रतिक्रिया दिएका छन्।
