नेपाली लगायतका टीपीएसवाहकले अब वर्क परमिट र रि-रजिष्ट्रेशन आवेदन अनलाइनबाटै दिनसक्ने
प्रकाशित मिति : मंसिर १३, २०७८ सोमबार
नेपाली लगायतका टीपीएसवाहकले अब वर्क परमिटको आवेदन अनलाइनबाटै दिनसक्ने भएका छन् । सबै टीपीएस आवेदकहरुले टीपीएस आवेदन आई ८२१ र वर्क परमिटको आवेदन आई ७६५ आवेदन अनलाइनबाटै दिनसक्ने युएससीआईएसले जनाएको छ ।
अहिले टीपीएसको दर्जा प्रदान गरिएका योग्य देशका आवेदकहरु नोभेम्बर २९ सम्म टीपीएस र वर्क परमिटका लागि अनलाइनबाटै आवेदन दिन योग्य छन् । अहिलेसम्म बर्मा, एल साल्भाडोर, हैटी, होण्डुरस, नेपाल, निकारागुवा, सोमालिया, साउथ सुडान, सुडान, सिरिया, भेनेजुएला, यमनलाई अमेरिकाले टीपीएसको दर्जा प्रदान गरेको छ ।
पहिलोपटक टीपीएसका लागि आवेदन दिनेहरु र रि रजिस्ट्रेशन गर्नेहरु अनलाइन आवेदनका लागि योग्य हुनेछन् । आवेदकहरुले टीपीएस आवेदन आई ८२१ का साथमा वर्क परमिटको आवेदन आई ७६५ आवेदन दिनसक्नेछन् । वर्क परमिटको आवेदन आई ७६५ आवेदन पछि अलग्गै पनि पेश गर्न सकिनेछ । तर एकैपटक आवेदन दिंदा छिटो वर्क परमिट प्राप्त हुने युएससीआईएसले जनाएको छ ।
अनलाइनबाट आवेदन दिनका लागि युएससीआईएसको माइ युएससीआईएस पेजमा गएर अनलाइन एकाउन्ट बनाउनुपर्छ । अनलाइनबाट आवेदन दिंदा सहज र युएससीआईएससँग इनबक्समार्फत सम्पर्क गर्न सकिन्छ । यसभन्दा अगाडि निश्चित देशका आवेदकलाईमात्र टीपीएस आवेदन आई ८२१ अनलाइनमार्फत फाइल गर्नसक्ने सुविधा रहेको थियो ।
कागजी रुपमा टीपीएस आवेदन आई ८२१ र वर्क परमिटको आवेदन आई ७६५ पेश गरेकाहरुले पनि अनलाइन एकाउन्ट बनाएर आफ्नो आवेदन ट्रयाक गर्न सक्नेछन् ।
नेपाल लगायतको टीपीएसको अवधि सन् २०२२ को डिसेम्बर ३१ सम्मका लागि कायम छ । नेपालसहित होण्डुरस, एल साल्भाडोर, निकारागुवा र सुडानको टीपीएसको अवधि १५ महिना थप गरेर डिसेम्बर ३१ सम्म बनाइएको थियो ।
नेपालीका टीपीएसको कागजातको अवधि स्वत सन् २०२२ को डिसेम्बर ३१ सम्म कायम छन् । टीपीएसवाहकले त्यसका लागि कुनै कदम चाल्न वा शुल्क तिर्न आवश्यक पर्दैन ।
वर्क परमिट, टीपीएस नोटिस अफ एक्सन आई ७९७ र आई ९४ को अवधि स्वत डिसेम्बर ३१ सम्म छ । टीपीएसका कागजातको म्याद थपिएको जाँच गर्न टीपीएसवाहक , रोजगारदाता वा अन्य एजेन्सीहरुले युएससीआईएसका ई भेरिफाई, रोजगार योग्यता प्रमाणिकरण वा सेभ जस्ता अनलाइन टुलको समेत प्रयोग गर्नसक्छन् । वर्क परमिटका लागि आवेदन दिएका तर वर्क परमिट प्राप्त नगरिसकेकाहरुले भने नयाँ म्याद सहितको वर्क परमिट प्राप्त गर्नेछन् ।
बीचका रि रजिस्ट्रेशन अवधिमा रि रजिस्ट्रेशन गर्न छुटाएका टीपीएसवाहकले अझै पनि रि रजिस्ट्रेशन गरेर टीपीएस कायम गर्नसक्ने भएका छन् । अब उनीहरुले अनलाइनमा आवेदन दिनसक्छन् । सन् २०१६ को अक्टोबर २६ देखि डिसेम्बर २७ सम्म र सन् २०१८ को मे २२ देखि जुलाई २३ सम्म सरकारले नेपाली टीपीएसवाहकका लागि रि रजिस्ट्रेशन खुलाएको थियो ।
यी मध्ये कुनै पनि अवधिमा राम्रोसँग रिरजिस्ट्रेशन नगरेका वा छुटेकाहरुले अझै पनि रिरजिस्ट्रेशन गर्नसक्छन् । तर त्यसका लागि पहिलो पटक सन् २०१५ मा भने भने टीपीएसका लागि आवेदन दिएको हुनुपर्छ । रिरजिस्ट्रेशन गर्नका लागि छुट्नुको राम्रो कारण पनि पेश गर्नुपर्छ ।
स्वत थपिएको अवधिबाट सुविधा लिनका लागि वर्क परमिटका लागि आवेदन दिनु पर्दैन । तपाईले फेडरल रजिस्टरमा प्रकाशित सुचनाका आधारमा २०२२ को डिसेम्बर ३१ सम्म प्रयोग गर्न सकिन्छ ।
यदि तपाई नेपालको टीपीएसवाहक हुनुहुन्छ र तपाईले २०२२ को डिसेम्बर ३१ सम्म नै म्याद उल्लेख भएको वर्क परमिट लिन चाहनुहुन्छ भने तपाईले वर्क परमिटका लागि अब अनलाइनबाट आई ७६५ फर्म भरेर आवेदन दिन सक्नुहुन्छ । तर उक्त फर्म भर्दा तपाईले फर्म सँग सम्बन्धित शुल्क भने तिनुपर्छ ।
यदि तपाईले नयाँ म्याद सहितको वर्क परमिट चाहनुहुन्न भने तपाईले आई ७६५ फर्म भर्न र शुल्क तिर्न आवश्यक छैन । तपाईले भविश्यमा कुनै पनि बेला नयाँ वर्क परमिट चाहनुहुन्छ भने त्यतीबेला पनि शुल्क तिरेर फर्म आई ७६५ भरेर आवेदन दिनसक्नुहुनेछ । तर त्यसका लागि तपाई टीपीएस पेन्डिंग अवस्थामा रहेको वा तपाई टीपीएसमा रहेको हुनुपर्छ ।
यदि तपाईले २०२२ को डिसेम्बर ३१ सम्म म्याद भएकै वर्क परमिट चाहनुहुन्छ भने तपाईले तपाईसँग अहिले भएको वर्क परमिटको म्याद नसकिदै वा सकिएपछि जहिले पनि आवेदन दिन सक्नुहुनेछ ।
यदि तपाईले वर्क परमिटका लागि आवेदन दिंदा बायोमेट्रिक शुल्क र आवेदन शुल्क वा दुईमध्ये एक तिर्न नसक्ने अवस्थामा हुनुहुन्छ भने तपाईले शुल्क मिनाहाका लागि फर्म आई ९१२ भरेर आवेदन दिन सक्नुहुनेछ ।