ग्वाटेमालाबाट विमानको ल्याण्डिङ गियरमा लुकेर अमेरिकाको मायामी आएका युवा नियन्त्रणमा
प्रकाशित मिति : मंसिर १२, २०७८ आईतबार
ग्वाटेमालाबाट विमानको ल्याण्डिङ गियरमा लुकेर अमेरिकाको मायामी विमानस्थलमा आएका एकजना २६ बर्षका युवालाई अधिकारीहरुले नियन्त्रणमा लिएका छन् । अमेरिकाको कस्टम एण्ड बोर्डर प्रोटेक्सन सीबीपीका अधिकारीहरुले ती युवालाई शनिबार मायामी विमानस्थलबाट नियन्त्रणमा लिएका हुन् । ग्वाटेमालादेखि मायामीको उडान अवधि झण्डै साढे २ घण्टा रहेको छ ।
ग्वाटेमाला सिटीबाट उडेको अमेरिकन एयरलाइन्सको ११८२ नम्बरको उडानको ल्याण्डिङ गियरको डिब्बामा लुकेर उनी अमेरिका आएका थिए । विहान १० बजेर ६ मिनेटमा अवतरण भइसकेपछि विमानले सुरक्षा मामलाका कारण कानून कार्यान्वयन निकायको सामना गर्नुपरेको अमेरिकन एयरलाइन्सले जनाएको छ ।
घटनाबारे अनुसन्धान भइरहेको जनाइएको छ । विमानस्थलमा नियन्त्रणमा लिएपछि ती युवालाई उपचारका लागि अस्पतालमा लगिएको थियो । विमानमा लुकाउन खोज्दा व्यक्तिहरुले आफूहरुलाई अत्यन्तै जोखिममा राख्ने गरेको सीबीपीले जनाएको छ ।
स्थानीय कानून व्यवसायी समन गोन्जालेजले आफूले अमेरिकामा अध्यागमन कानूनको अभ्यास गर्न थालेको १८ बर्षमा यस्तो घटना पहिलोपटक देखेको बताएका छन् । यस्तो जोखिमका बीचपनि सकुशल अमेरिका आउन सफल भएको यो घटनालाई चमत्कार भनिएको छ ।
उनलाई अमेरिकामा शरणका लागि यसरी लुकेर आएको व्यक्तिको रुपमा वर्गिकरण गरिने छ भने आगामी दिनमा उनको शरणको आवेदनको मूल्यांकन गरिने छ । यदि उनले एसाइलम जितेको खण्डमा अमेरिकाको स्थायी बासिन्दा हुन पाउनेछन् भने हारेको खण्डमा अमेरिकन एयरलाइन्सकै खर्चमा उनलाई ग्वाटेमाला फिर्ता पठाइनेछ ।
विमानको ल्याण्डिङ गियरमा लुकेर आउने कैयन आप्रवासीको बीचमा खसेर मृत्यु समेत हुने गरेको छ । कतिपयको चिसोका कारण समेत मृत्यु भएका कैयन घटना रहेका छन् ।