नेपालका ५ चाड समेटिएको जसवन्त देव श्रेष्ठको बृत्तचित्र डिस्कभरी च्यानलले प्रिमियर गर्ने
प्रकाशित मिति : कार्तिक १६, २०७८ मंगलबार
नेपालका विभिन्न पाँचवटा चाडपर्वहरु समेटेर ५ भागमा निर्माण गरिएको जसवन्त देव श्रेष्ठको बृत्तचित्र विश्वचर्चित डिस्कभरी च्यानलले प्रिमियर गर्ने भएको छ । डिस्कभरी एसिया च्यानलले श्रेष्ठले निर्माण र निर्देशन गरेको बृत्तचित्र फेष्टिवल्सको पाँचवटा भाग प्रशारण गर्ने घोषणा गरेको छ । श्रेष्ठ एमि अवार्डको नोमिनेशनमा परेका तथा विभिन्न अवार्डहरु जितेका अमेरिका निवासी नेपाली मूलका कलाकार हुन् ।
अमेरिकाको लस एन्जलसमा रहेको क्रियटिभ हाइट्स इन्टरटेन्मेन्टको ब्यानरमा निर्माण गरिएको यो बृत्तचित्र १७ वटा एसियाली मुलुकमा प्रशारण हुनेछ । यो कम्पनीको ब्यानरमा निर्मित सामाग्रीहरुले विभिन्न अवार्डहरु जित्न सफल भएका छन् भने एमी अवार्डको नोमिनेशनमा समेत परेको छ ।
डिस्कभरी एसियामार्फत यो बृत्तचित्र सिंगापुर, ताइवान, थाइल्याण्ड, अफगानिस्तान, बु्रनाई, कम्बोडिया, हङकङ, इन्डोनेशिया, लाओस, मकाओ, मलेसिया, मंगोलिया, मरिसस, म्यानमार, पपुवा न्यु गिनी, शेशेल्स र फिलिपिन्समा हेर्न सकिने भएको छ । बृत्तचित्र नोभेम्बर १७ देखि हरेक बुधबार पाँचसातासम्म प्रशारण हुनेछ । थाइल्याण्डको समय अनुशार बुधबार बेलुका ८ बजे बृत्तचित्र प्रशारण गरिने जनाइएको छ ।
नेपालका सांस्कृतिक महत्वका पर्वहरु समेटिएको यो बृत्तचित्रमा दशैं, तिहार, सरस्वती पूजा, गाइजात्रा र महाशिवरात्रीलाई फिचर गरिएको छ । प्रत्येक भागमा छुट्टा छुट्टै पर्वको बारेमा रहेको यो बृत्तचित्र निर्माण गर्न तीनबर्ष लागेको श्रेष्ठले जानकारी दिए ।
डिस्कभरी एसिया च्यानलसँग सहकार्य गर्न पाएकोमा आफूहरुलाई गर्व लागेको र यो बृत्तचित्र आफ्नो हृदयको एकदमै नजिक रहेको श्रेष्ठले बताए । उनले भने यो मेरो देशका लागि एउटा न्यानो प्रेमपत्र हो । यो बृत्तचित्रले नेपालको सांस्कृतिक सम्पदा र पर्यटनको प्रवद्र्धनमा मद्दत गर्ने अपेक्षा छ ।