अमेरिकी पासपोर्टको आवेदन शुल्क बृद्धि, डिसेम्बर २७ अगाडि आवेदन दिनेलाई पूरानै शुल्क
प्रकाशित मिति : कार्तिक १२, २०७८ शुक्रबार
अमेरिकी पासपोर्ट
अमेरिकी सरकारको विदेश मन्त्रालयले डिसेम्बर २७ देखि लागु हुनेगरी पासपोर्टको आवेदन शुल्क बृद्धि गरेको छ । पासपोर्ट शुल्क ११० डलरबाट १३० डलर बनाइएको अन्तिम सुचना फेडरल रजिष्टरमा प्रकाशित गरिएको छ । यो शुल्कबृद्धि समग्रमा १८ प्रतिशत रहेको जनाइएको छ । सुरक्षा शुल्क भने ३३ दशमलव ३३ प्रतिशत बृद्धि भएको छ ।
पासपोर्ट सुरक्षा शुल्कका नाममा उक्त शुल्कबृद्धि गरिएको हो । अहिलेसम्म यो शुल्क ६० डलरमात्र रहेकोमा ८० डलर बनाइएको छ । जस अनुशार आवेदकले अमेरिकी पासपोर्टका लागि आवेदन दिंदा अहिलेसम्म ११० डलर तिर्दै आएकोमा अब १३० डलर हुनेछ ।
पासपोर्ट आवेदन स्वीकार गर्ने केन्द्र वा एजेन्सीले छुट्टै ३५ डलर समेत लिने गर्छन् । जस अनुशार पहिलोपटक पासपोर्ट आवेदन दिने बयस्कले १६५ डलर तिर्नुपर्नेछ । पासपोर्ट कार्ड समेत लिन चाहनेहरुले अतिरिक्त शुल्क तिर्नुपर्छ । पासपोर्ट नविकरणका लागि पनि अहिलेसम्म ११० डलर रहेकोमा डिसेम्बर २७ पछि १३० डलर तिर्नुपर्नेछ ।
त्यस्तै बालबालिकाहरुका लागि पासपोर्ट आवेदन दिंदा ८० डलरमात्र लाग्दै आएकोमा अब १०० डलर शुल्क तिर्नुपर्नेछ । शुल्कबृद्धिबाट बार्षिक रुपमा सरकारलाई थप ३१८ मिलियन डलर आम्दानी हुने अपेक्षा गरिएको छ । आर्थिक बर्ष २०२२ मा झण्डै १६ मिलियन पासपोर्ट जारी हुने अपेक्षा गरिएको छ ।