लन्डन आक्रमणमा घाइते अठचालीसमध्ये एक्काइस जनाको अवस्था गम्भीर
प्रकाशित मिति : जेष्ठ २२, २०७४ सोमबार
मध्य लन्डनमा शनिबार राति भएको दुई वटा आतङ्ककारी आक्रमणमा घाइते भएका ४८ जनामध्ये २१ जनाको स्वास्थ्यस्थिति गम्भीर रहेको बेलायतको राष्ट्रिय स्वास्थ्य सेवा (एनएचएस) ले जनाएको छ ।
घाइते सवैजनालाई उपचारार्थ विभिन्न पाँच अस्पतालमा भर्ना गरिएको छ भने सामान्य घाइते भएका केही उपचार पश्चात घर फर्किएका छन् ।
यसैवीच, प्रधानमन्त्री थेरेसा मे ले आइतबार नै विभिन्न अस्पतालमा पुगी त्यहाँ रहेका घाइतेजन र उनीहरूका आफन्तलाई भेट्नुभएको छ ।
त्यसैगरी, आक्रमणमा सम्लग्न भएको आशङ्कामा प्रहरीले आइतबार बाह्रजनालाई पक्राउ गरेको छ । पूर्वी लण्डनमा पक्राउ परेका उनीहरू विभिन्न स्थानमा शङ्कास्पद रूपमा भेटिएका प्रहरीले बताएको छ ।
प्रहरीले थप शङ्कास्पद व्यक्तिको खोजीगरिरहेको जनाएको छ ।
शनिबार राति भएको दुई आक्रमणमा परी सात जनाको मृत्यु भएको र ४८ जना घाइते भएका प्रहरीले पुष्टि गरेको छ । सिन्ह्वा