Follow @khasokhasmag

बाइडेन प्रशासनले १ बर्षमा १ लाख २५ हजारसम्म शरणार्थी भित्राउने, दक्षिण एसियाबाट ३५ हजार


प्रकाशित मिति : कार्तिक २, २०७८ मंगलबार

बाइडेन प्रशासनले चालु आर्थिक बर्षमा १ लाख २५ हजारसम्म शरणार्थी भित्राउने आधिकारिक कागजात फेडरल रजिष्टरमा प्रकाशित भएको छ । चालु आर्थिक बर्षका लागि राष्ट्रपति जो बाइडेनले शरणार्थीका लागि तय गरेको कोटा संख्याबारेको कागजात सोमबार फेडरल रजिष्टरमा प्रकाशित भएको हो ।

अफ्रिकाबाट ४० हजार, पूर्वी एसियाबाट १५ हजार, युरोप र मध्य एसियाबाट १० हजार, ल्याटिन अमेरिका र क्यारेबियनबाट १५ हजारसम्म शरणार्थी अमेरिका भित्राउने कोटा तय गरिएको छ । त्यस्तै पूर्वी एसिया नजिक र दक्षिण एसियाबाट ३५ हजारसम्म शरणार्थी भित्राइने छ भने अन्य थप १० हजारसम्म शरणार्थी भित्राइने भएको छ ।

आर्थिक बर्ष २०२१ मा अमेरिकामा अहिलेसम्मकै कम संख्यामा शरणार्थी भित्राइएको छ । ६२ हजार ५ सयसम्म शरणार्थी भित्राउनसकिने कोटा रहेपनि जम्मा ११ हजार ४ सय ११ जनामात्र शरणार्थीहरु अमेरिका आएका छन् । जुन विगत ४० बर्षमा सबैभन्दा कम बार्षिक संख्या हो ।

अक्टोबर १ देखि आर्थिक बर्ष २०२२ सुरु भइसकेको छ । डोनाल्ड ट्रम्पले सेप्टेम्बर ३० मा अन्त्य भएको आर्थिक बर्ष २०२१ का लागि जम्मा १५ हजार शरणार्थीको कोटा तोकेका थिए । तर बाइडेन राष्ट्रपति भएपछि मे महिनामा यो कोटा बढाएर ६२ हजार ५ सय बनाएका थिए । तर कोटा बढाएपछि अमेरिका भित्रिएका शरणार्थी संख्या भने ट्रम्पले तय गरेको कोटाभन्दा पनि कम रहेको छ ।

अमेरिकामा शरणार्थीका रुपमा आउनका लागि व्यक्ति अमेरिका बाहिर रहेको हुनुपर्छ भने उक्त स्टाटस स्वीकृत भएपछिमात्र अमेरिका आउन पाइन्छ । अमेरिकामा आइसकेपछि दावी गरिने एसाइलम त्यो भन्दा फरक हो ।

सोमबार फेडरल रजिष्टरमा प्रकाशित सुचना यहाँ पढ्नुहोला ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com