नोभेम्बर ८ पछि अमेरिका प्रवेशमा भ्याक्सिन अनिवार्यको नियमबारे ७ प्रश्नको जवाफ

खसोखास अमेरिका ब्यूरो

---

प्रकाशित मिति : कार्तिक १, २०७८ सोमबार

आगामी नोभेम्बर ८ पछि अमेरिका प्रवेशका लागि भ्याक्सिन अनिवार्य गरिएको छ । भ्याक्सिनको पूर्ण डोज लगाएका विदेशीहरुलाईमात्र अमेरिका प्रवेश दिइनेछ, अन्यले प्रवेश पाउनेछैनन् ।

कस्ता व्यक्ति अमेरिका आउन पाउनेछन् ?

भ्याक्सिनको पूर्ण डोज लगाएका विदेशीहरुलेमात्र अमेरिका प्रवेश पाउनेछन् । जसको अर्थ एउटामात्र डोज लगाउनुपर्ने जोन्सन एण्ड जोन्सनको डोज लगाएको १४ दिन र अन्य भ्याक्सिनको दोश्रो डोज लगाएको १४ दिन पूरा भइसकेको हुनुपर्छ ।

अहिलेसम्म भ्याक्सिन लगाएको प्रमाणविना नै कोरोना परीक्षणको नेगेटिभ रिपोर्ट पेश गरेर अमेरिका आइरहेका देशहरुबाट पनि नोभेम्बर ८ पछि भ्याक्सिन नलगाएका विदेशीहरु अमेरिका आउन पाउनेछैनन् । तर भ्याक्सिन लगाएकाहरु ब्राजिल, चीन, यूके, साउथ अफ्रिका, चीन, इरान, आयरल्याण्ड र शेंगेन क्षेत्रबाट पनि आउन पाउनेछन् । अहिले ब्राजिल, चीन, यूके, साउथ अफ्रिका, चीन, इरान, आयरल्याण्ड र शेंगेन क्षेत्रबाट अमेरिका प्रवेशमा अत्यावश्यकबाहेकका अन्यलाई रोक छ ।

कुन कुन भ्याक्सिन स्वीकार गरिनेछ ?

अमेरिकाले अमेरिकामा एफडीएबाट स्वीकृत र विश्व स्वास्थ्य संगठनबाट स्वीकृत भ्याक्सिनलाईमात्र मान्यता दिने भएको छ । जस अनुशार चाइनिज भ्याक्सिनहरु साइनोफार्म (भेरोसेल) र साइनोभ्याक (कोरोनाभ्याक) लगाएकाहरुले अमेरिका प्रवेश पाउनेछन् भने रसियन भ्याक्सिन स्पुत्निक भी लगाएकाहरुलाई भने अमेरिका प्रवेश दिइनेछैन ।

नेपालमा सबैभन्दा बढी कोरोनाबिरुद्धको भ्याक्सिन साइनोफार्म अन्तरगतको भेरोसेल वितरण भइरहेको छ । त्यस्तै नेपालमा वितरण गरिएको जोन्सन एण्ड जोन्सन र कोभिशिल्ड (आष्ट्राजेनेका) लगाएकाहरुले पनि अमेरिका प्रवेश गर्न पाउनेछन् । त्यो बाहेक फाइजर र मोडेर्ना भ्याक्सिन लगाएकाहरुलाई पनि अमेरिका प्रवेश दिइनेछ । उनीहरुले अमेरिका प्रवेशका लागि उपयुक्त भिसा, तीनदिनभित्र स्वाब संकलन गरिएको कोरोनाको नेगेटिभ रिपोर्ट र पूर्णरुपमा भ्याक्सिन लगाएको प्रमाण पेश गर्नुपर्नेछ ।

भ्याक्सिन नलगाएका अमेरिकन नागरिकलाई पनि रोकिनेछ?

नोभेम्बर ८ पछि भ्याक्सिन नलगाएका अमेरिकनहरुलाई समेत अमेरिका प्रवेशमा कडा नियम लागु गरिने भएको छ भने भ्याक्सिन नलगाएका गैर अमेरिकनहरुलाई अमेरिका प्रवेशमा रोक लगाउने भएको छ ।

भ्याक्सिन नलगाएका अमेरिकनहरुलाई नोभेम्बर ८ पछि पनि अमेरिका प्रवेश त दिइने छ तर उनीहरुले अमेरिका फर्कने विमान चढ्नुभन्दा एक दिन अगाडि कोरोनो परीक्षण गरेर नेगेटिभ रिपोर्ट ल्याउनुपर्नेछ । साथै उनीहरु अमेरिका आइसकेपछि पनि कोरोना परीक्षण लगायतका अतिरिक्त नियमहरुको पालना गर्नुपर्नेछ ।

भ्याक्सिन नलगाएका बालबालिकाहरुको के हुन्छ ?

भ्याक्सिनका लागि योग्य नभएको उमेरका बालबालिकाहरुका लागि यो नियम लागु हुनेछैन । उनीहरु भ्याक्सिन नलगाएपनि अमेरिका आउन पाउनेछन् । विदेशी नागरिकका बालबालिकाहरु र अमेरिकन नागरिकका बालबालिकाहरुका लागि एउटै नियम लागु हुने नहुने स्पष्ट छैन ।

बालबालिकाहरुका सन्दर्भमा धेरै कुरा नबताइएपनि कोरोना परीक्षण लगायतका कैयन नियमहरु भने लागु हुने अपेक्षा गरिएको छ । अमेरिकामा १२ बर्षभन्दा माथिका बालबालिकाहरुका लागि भ्याक्सिन स्वीकृत गरिएकाले उक्त नियमको पालना कसरी हुने भन्नेबारे आगामी दिनमा थप स्पष्ट हुने अपेक्षा गरिएको छ ।

भ्याक्सिनका मिश्रित डोज लगाएकाहरुबारे के हुन्छ ?

भ्याक्सिनको मिश्रण डोज लगाएकाहरुलाई स्वीकार गरिने सीडीसीले जनाएको छ । अमेरिकामा भ्याक्सिनको मिश्रित डोजका लागि सरकारले औपचारिक अनुमति भने प्रदान गरेको छैन ।

भ्याक्सिनको मिश्रित डोजमा दोश्रो डोज लगाएको १४ दिनपछि पूर्णमात्रामा भ्याक्सिन लगाएको रुपमा मान्यता दिइनेछ । त्यस्ता यात्रुहरु मिश्रित डोज भ्याक्सिन लगाएको प्रमाण देखाएर अमेरिका आउन पाउनेछन् ।

के भ्याक्सिन लगाएकाले कोरोना परीक्षण पनि गर्नुपर्छ ?

कोरोनाबिरुद्धको भ्याक्सिनको पूर्ण डोज लगाएकाहरुले पनि कोरोना नेगेटिभ रिपोर्ट पेश गर्नुपर्छ । विमान चढ्नुअगाडि ७२ घण्टाभित्र सकलन गरिएको स्वाबको रिपोर्टलाईमात्र मान्यता दिइनेछ ।

भ्याक्सिन नलगाएका अमेरिकनहरुका सन्दर्भमा भने ७२ घण्टाभित्र संकलन गरिएको स्वाबको रिपोर्टलाई मान्यता दिइनेछैन । उनीले बढीमा एक दिन अगाडि कोरोनो परीक्षण गरेर नेगेटिभ रिपोर्ट ल्याउनुपर्नेछ ।

तत्कालै स्थलनाकाबाट भ्याक्सिन लगाएकाहरु प्रवेश गर्दा कोरोना परीक्षणको रिपोर्ट अनिवार्य गरिएको छैन । तर जनवरीपछि भने अमेरिकामा कुनै पनि तरिकाबाट प्रवेश गर्दा भ्याक्सिन लगाएको प्रमाण अनिवार्य पेश गर्नुपर्नेछ ।

कस्ता व्यक्ति अमेरिका आउन पाउनेछैनन् ?

नोभेम्बर ८ देखि लागु हुने नियमले भ्याक्सिन नलगाएका अन्तर्राष्ट्रिय यात्रुहरुलाई अमेरिका प्रवेश बृहत रोक लगाउनेछ । अहिले कोरोना सम्बन्धित यात्रा प्रतिबन्ध नलागेका देशहरुबाट पनि भ्याक्सिन नलगाएकाहरुलाई नोभेम्बर ८ पछि अमेरिका प्रवेश दिइनेछैन ।

अत्यन्तै सिमितमात्रामा मात्र छुट प्रदान गरिनेछ ।