ग्रिनकार्ड लगायतका सन्दर्भमा ४ प्रकारका समस्या आउँदा यसरी गर्नुहोस् युएससीआईएसमा फोन
प्रकाशित मिति : आश्विन २६, २०७८ मंगलबार
युएससीआईएसले ग्रिनकार्ड लगायतका अध्यागमन विषयमा कहिले र कसरी प्रभावकारी रुपमा सम्पर्क गर्ने भन्ने सन्दर्भमा टिप्सहरु जारी गरेको छ । युएससीआईएसले कैयन जानकारीहरु अनलाइनमा नै राखेकाले सधै युएससीआइएसमा फोनबाट सम्पर्क गरिरहन आवश्यक हुँदैन । निश्चित प्रकारका सेवाहरुका लागि भने फोनबाट सम्पर्क गर्नु उपयुक्त हुन्छ ।
विभिन्न ४ प्रकारका अवस्थामामात्र युएससीआईएसमा फोनमार्फत सम्पर्क गर्न सुझाव दिइएको छ । बायोमेट्रिक अप्वाइन्टमेन्ट वा अन्तरवार्ताका लागि नयाँ मिति अनुरोध गर्न वा सार्न परेमा युएससीआईएसको सम्पर्क केन्द्रमा फोन गर्नुपर्छ । त्यस्तै आपतकालिन रुपमा यात्रा गर्नका लागि इमर्जेन्सी एड्भान्स परोल आवश्यक परेमा वा पासपोर्टमा छाप लगाउने लगायतका बैध स्थायी बासिन्दाको प्रमाण आवश्यक पर्ने अवस्था भएमा युएससीआईएसमा सम्पर्क गर्नुपर्छ ।
यदि युएससीआईएसको मापदण्डभित्र परेको खण्डमा आफ्नो आवेदनलाई तीब्र गतिको प्रकृयामा लैजान पनि युएससीआईएसमा फोन गर्नुपर्छ । समयमै फाइल गरेका र युएससीआईएसका अनुरोधको समयमै जवाफ दिएका आवेदनको सन्दर्भमा त्यस्ता आवेदनबारे छिटो निर्णय नलिए व्यक्ति वा कम्पनीमा कडा प्रकारको आर्थिक क्षति हुने अवस्थामा युएससीआईएस समक्ष शीघ्र निर्णयका लागि अनुरोध गर्न सकिन्छ ।
त्यस्तै आपतकालिन वा मानवीय कारणमा, अमेरिकाको सांस्कृतिक र सामाजिक रुचीमा पर्ने गैर नाफामुलक संस्थाहरुको अनुरोध भएमा, अमेरिकी सरकारको संघीय एजेन्सीहरु सम्बन्धित तत्काल निर्णय गर्नुपर्ने आवेदन भएमा र युएससीआइएसको गल्ती भएका आवेदनका सन्दर्भमा पनि तत्काल निर्णयको अनुरोध गर्न सकिन्छ । त्यसका लागि युएससीआईएसको सम्पर्क केन्द्रमा फोन गर्नुपर्छ । त्यस्तै कुनै आवेदनमा युएससीआईएसको सामान्य प्रकृया अवधिभन्दा लामो समय लागेको अवस्थामा र वास्तविक रुपमै सहायता आवश्यक भएको कुनै सन्दर्भमा पनि युएससीआईएसमा फोन गर्न सकिन्छ ।
फोन गर्दा प्रतिनिधिसमक्ष नपुगी अटोमेटेड प्रणालीमा पनि जानसक्छ । आवेदकले फोनमा प्रत्यक्ष कुराकानी नगरिकनै गर्न सक्ने सेवाहरुका लागि यस्तो हुनसक्छ । व्यक्तिलाई प्रत्यक्ष कुराकानी गर्नैैपर्ने अवस्थाका लागि प्रत्यक्ष सहायता सेवा सुरक्षित गरिएको हुन्छ । कर्मचारीहरुको कमी लगायतका समस्याका कारण फोनमा प्रतिक्षा अवधि लामो हुने गरेको जनाइएको छ ।
सोमबारदेखि शुक्रबारसम्म न्युयोर्क समय विहान ८ बजेदेखि बेलुका ८ बजेसम्म फोन गर्न सकिन्छ । तर फोन गर्दा प्रतिनिधि नभेटिएको खण्डमा वा विकल्पकरुहरुले प्रतिनिधिसमक्ष नलगेको खण्डमा आफ्नो आवेदनबारेको सोधपुछ अनलाइनबाट पनि गर्न सकिनेछ । त्यस्तै युएससीआईएसमा अनलाइन एकाउन्ट खोलेर अनलाइनबाट फाइल गरिएको आवेदन वा कागजीरुपमा फाइल गरेर अनलाइनमा आवेदन कनेक्ट गरेको खण्डमा धेरै कुराहरु अनलाइनमै हेर्न सकिने व्यवस्था रहेको छ । युएससीआईएसबाट भएका अपडेट, जारी सुचना, थप कागजातका अनुरोध लगायत सबै अनलाइनमा हेर्न सकिन्छ ।
युएससीआईएसले तपाईलाई कलब्याक गर्नसक्ने प्रावधान समेत रहेको छ । पहिलोपटक कलब्याक गर्दा नउठेको खण्डमा युएससीआईएसले अर्को फोन गर्ने भन्दै सन्देश छाड्छ । दोश्रो कल ६० देखि ९० मिनेटभित्र गर्छ । दोश्रो प्रयासमा पनि फोन नउठेमा युएससीआईएसले यसबारे इमेल पठाउँछ । कहिलेकाँही युएससीआईएसका नाममा ठगहरुबाट पनि फोन आउनसक्ने भएकाले यसबारे सावधानी अपनाउन जरुरी हुन्छ ।
युएससीआईएसले फर्म जी २८ मा उल्लेख भएका कानूनी प्रतिनिधिसँगमात्र तपाईको आवेदनका बारेमा कुरा गर्नसक्छ अर्थात् सुचनाहरु उपलब्ध गराउन सक्छ । त्यहाँ उल्लेख नभएका अन्य व्यक्ति वा पारालिगललाई सुचनाहरु उपलब्ध गराउँदैन ।
युएससीआईएसमा फोन गर्दा सुरुमा पहिलो श्रेणीको कर्मचारीले फोनको जवाफ दिन्छन् । यदि तपाईको आवेदनमा युएससीआईएसको थप सहायता आवश्यक पर्ने भएमा दोश्रो श्रेणीको कर्मचारीलाई फोन ट्रान्सफर गरिन्छ । आपतकालिन अवस्थाका अनुरोधहरुमा दोश्रो श्रेणीका कर्मचारीहरुले सहायता उपलब्ध गराउँछन् । युएससीआईएसले अँग्रेजी र स्पानिस भाषामा सेवा उपलब्ध गराउँछ । त्यो बाहेक अन्य भाषा अनुवादक आवश्यक परेमा आफै व्यवस्था गर्नुपर्छ ।
युएससीआईएसमा फोन गर्दा सम्पर्क नम्बर ८०० ३७५ ५२८३ मा फोन गर्नुहोला ।