कार्तिक १० गतेदेखि नेपाली कामदार कोरिया जान पाउने,प्राथमिकतामा पुरानै कामदार
प्रकाशित मिति : आश्विन २४, २०७८ आईतबार
कोरोनाभाइरसका कारण लामो समयदेखि अवरुद्ध रहेको कोरिया रोजगारी कात्तिक दोस्रो सातादेखि खुल्ने भएको छ । कात्तिकको दोस्रो साताबाट नेपाली कामदार कोरिया जान पाउने भएका हुन् ।
पहिले काम गरेर फर्किएर आएका ५० जना कामदार कार्तिक १० गते जाने र त्यसपछि अरू कामदार जान पाउने छन् । नेपाल र कोरिया सरकारबीच भएको श्रम सम्झौता अनुसार सन् २००८ देखि कोरियाले नेपाली कामदारहरु लिँदै आएको छ।
भाषा र सीप परीक्षा उत्तीर्ण गरेर नेपाली कामदार कोरिया जाने प्रक्रिया २० महिना देखि कोरोनाभाइरसका कारण रोकिएको थियो ।
करियाले ११९ जना कामदारको नाम पठाएको वैदेशिक रोजगार विभागका महानिर्देशक दीपक काफ्लेले बताए । उनले भने ‘तीमध्ये कार्तिकको १० गते पहिलो उडानमा ५० जना पठाउँछौँ। त्यसपछिको उडान कहिले हुन्छ भन्ने निश्चित भइसकेको छैन।’ वैदेशिक रोजगारीमा जानका निम्ति नेपाली युवाहरूलाई कोभिड खोप दिइएको छ ।
पहिले काम गरेर आइसकेका त्यस्ता कामदारको सङ्ख्या ३ हजारको हाराहारीमा रहेको अनि भाषा र सीप परीक्षा उत्तीर्ण गरेर बसेका कामदारको सङ्ख्या ७ हजारको हाराहारीमा रहेका छन् । भने यस वर्षको भाषा परीक्षा हुने वा नहुने भन्नेमा अझै टुङ्गो नभएको अधिकारीहरूले बताएका छन्।
परीक्षाका लागि आवश्यक भौतिक पूर्वाधारको निर्माण जारी रहे पनि पहिले उत्तीर्ण गरेका कामदारलाई पठाएर मात्रै अर्को परीक्षा गर्दा सहज हुने उनीहरूको भनाई छ । हालसम्म कोरियामा कामदारका रूपमा ६० हजार नेपाली गइसकेकोमा ३१ हजारको हाराहारीमा अहिले पनि कोरियामै रोजगारीमा रहेको बताइएको छ