नेपालबाट चोरिएर अमेरिका पुगेको दशौं शताब्दीको शिवको मूर्ति न्युयोर्कको म्युजियमबाट फिर्ता
प्रकाशित मिति : आश्विन १४, २०७८ बिहीबार
न्युयोर्कको मेट्रोपोलिन म्युजियम अफ आर्टले तपस्वीसँग हिमालयनमा रहेका शिवको १० औं शताब्दीको मूर्ती नेपाल सरकारलाई फिर्ता दिएको न्युयोर्कको नेपाली महावाणिज्यदूतावासले जनाएको छ । मूर्तिमा भगवान शिव तपस्वीहरुसँग हिमालयमा रहेको निवासमा रहेको आकृति बनाइएको छ ।
कार्यवाहक महावाणिज्यदूत विष्णुप्रसाद गौतम र संग्राहालयका सीईओ तथा अध्यक्ष डानियल एच वीसबीच यसबारेको सम्झौतामा हस्ताक्षर समेत गरिएको छ । मूर्तिमा शिव कैलाश पर्वतमा रहेको निवासमा दुईजना चेलाहरुसँग उभिएको देखिन्छ । यो मूर्ति झण्डै १३ इन्च अग्लो रहेको छ ।
यो मूर्ति सन् १९९५ मा कसैले न्युयोर्कको मेट्रोपोलिन म्युजियम अफ आर्टलाई दिएको थियो । लैंनसिंग बाङदेलले लेखेको पुस्तकका आधारमा उक्त मूर्ति काठमाडौंको कंकेश्वरी मन्दिरको रहेको र त्यहाँबाट चोरिएर अमेरिका पुगेको पुष्टी भएको थियो ।
नेपालबाट चोरिएको मूर्ति आफ्नो संग्राहालयमा रहेको थाहा पाएपछि संग्राहालयले यसैबर्षको सुरुतिर नेपाल सरकारलाई सम्पर्क गरेको थियो । नेपालको मूर्ति नेपाललाई नै फिर्ता दिएकोमा महावाणिज्यदूत गौतमले मेट्रोपोलिन म्युजियम अफ आर्टलाई धन्यवाद दिएका छन् ।
यस अगाडि मेट्रोपोलिन म्युजियम अफ आर्टले सन् २०१८ मा बुद्ध र उमाशंकरको मूर्ति पनि नेपाललाई फिर्ता दिएको थियो । नेपालबाट चोरिएर अमेरिका पुगेका पुरातात्वीकम महत्वका बस्तु र मूर्तिहरु फर्काउन यस अगाडि अमेरिकी सरकारले समेत सहयोग गरेको थियो ।
त्यस्तै केही महिना अगाडि पाटनबाट चोरी भएको लक्ष्मी-नारायणको मूर्ति अमेरिकाको संघीय अनुसन्धान ब्यूरो एफबीआईले वासिङ्टन डीसीस्थित नेपाली राजदूतावासमा बुझाएको थियो । वासुदेवकमलाजा भनिने लक्ष्मी(नारायणको उक्त काँस्य मूर्ति १२औँ र १५औँ शताब्दीबीचको पुरातात्त्विक सम्पदा हो। सन् १९८४ मा हराउनुअघि पाटनमा उक्त मूर्तिको पूजा हुने गरेको थियो।यो मूर्ति ३७ वर्षअगाडि चोरी भएको थियो ।
२०५० सालदेखि नेपालबाट हराएका वा चोरिएका मूर्तिहरू फर्काइन थालेको हो । हालसम्म ६३ वटा मूर्ति विभिन्न देशबाट नेपालमा फर्काइसकिएको छ।