युएससीआईएसका ७ प्रकारका सुचनाको जवाफ थप ६० दिनभित्र दिन सकिने म्याद जनवरी १५ सम्म
प्रकाशित मिति : आश्विन ९, २०७८ शनिबार
युएससीआईएसका ७ प्रकारका सुचनाको जवाफ उक्त सुचनामा उल्लेख भएको डेडलाइन नाघिसकेपछि पनि अतिरिक्त ६० दिनभित्र दिन सकिने म्याद जनवरी १५ सम्म थप गरिएको छ । युएससीआईएसले एक सुचना जारी गर्दै जनवरी १५ सम्म आवेदकले विभिन्न ६ प्रकारका सुचनाको जवाफ पठाउनका लागि उक्त सुचनामा उल्लेख भएको मितिबाहेक अतिरिक्त ६० दिन प्राप्त गर्नसक्ने जनाएको छ ।
थप कागजातको माग अर्थात् आरएफई, थप कागजातको मागको निरन्तरता, आवेदन अस्वीकार गर्ने आशयको सुचना अर्थात् नोटिस अफ इन्टेन्ड टु डिनाई, ग्रिनकार्ड वा अन्य कुनै कागजात खारेज गर्ने आशयको सुचना, ग्रिनकार्ड वा अन्य कुनै कागजात बचाउने आशयको सुचना, क्षेत्रीय केन्द्र खारेज गर्ने आशयको सुचना र नागरिकता आवेदन स्वीकृत भइसकेपछि प्राप्त खराब विवराणका लागि युएससीआईएसबाट आवेदन फाइल पुन खोल्ने आशयको सुचना लगायतमा त्यसको जवाफ दिनका लागि आवेदकलाई अतिरिक्त ६० दिन प्राप्त हुनेछ ।
उदाहरणका लागि कुनै आवेदकलाई पठाइएका यी मध्ये कुनै एक सुचनामा जवाफ दिने डेडलाइन अक्टोबर १ सम्म तोकिएको छ भने उनीहरुले अतिरिक्त ६० दिन अर्थात् नोभेम्बरको अन्तिमसम्म पनि जवाफ पठाउन सक्नेछन् । सुरुमा यो सुविधा सन् २०२० को मार्चमा घोषणा गरिएकोमा युएससीआईएसले पटकपटक थप्दै आएको छ । अहिले युएससीआईएसले यो सुविधा आगामी जनवरी १५ सम्मका लागि थप गरेको हो ।
त्यस्तै नागरिकताबारेको निर्णयका लागि सुनुवाईबारेको सुचना र अपिलका लागि पठाइएको सुचनाका सन्दर्भमा पनि ६० दिन प्राप्त हुनेछ । तर युएससीआईएसले निर्णय जारी गरेको मितिले ६० दिनभित्र उक्त आवेदन दिइसकेको हुनुपर्छ । साथै युएससीआईएसले सन् २०२० को मार्च १ देखि सन् २०२२ को जनवरी १५ सम्म त्यस्तो निर्णय गरेको हुनुपर्नेछ । सामान्यतया अपिल वा मोसनका लागि फर्म आई २९० बी र सुनुवाईको अनुरोधका लागि एन ३३६ फर्म भर्न ३० दिनदिनको मात्र अवधि दिइएको हुन्छ । तर अब ६० दिनभित्र बुझाउन सकिनेछ ।
याद गर्नुहोस्, युएसीआईएसका आवेदनकलाई पठाइएका उल्लेखित सुचना वा अनुरोधको जवाफ आगामी जनवरी २१ सम्म पठाउन सकिनेगरी तय गरिएको होइन । सुचनामा उल्लेखित डेडलाइनभन्दा ६० दिनमात्र थप गरिएको हो । अर्थात् युएससीआईएसले आगामी जनवरी १५ सम्मको मितिमा जारी गर्ने त्यस्ता सुचना वा अनुरोधका सन्दर्भमा अतिरिक्त ६० दिनमात्र थपिएको हो ।