अफगानिस्तानमा रहेका १५ सय मध्ये ९०६ नेपाली स्वेदश फिर्ता, ३४ लाई यसै साता ल्याउन पहल
प्रकाशित मिति : भाद्र २८, २०७८ सोमबार
अफगानिस्तानमा रहेका झण्डै १५ सय नेपालीहरूमध्ये ९०६ जना नेपाल आइसकेका छन् भने काबुलमा रोकिएका ३४ नेपालीलाई यसै साता फर्काउन पहल भइरहेको सरकारी भनाई छ । अफगानिस्तानमा अलपत्र परेका ३४ नेपाली नागरिकलाई चार्टर्ड विमानमार्फत नेपाल फर्काउन पहल भइरहेको जनाइएको छ।
अमेरिकी सेनाको फिर्तीसँगै बन्द रहेको काबुल विमानस्थलबाट कमर्शियल उडानहरु पनि सुरु भएका छन् । तालिवानबाट स्वीकृति पाएकाहरुले अहिले ती उडानमार्फत अफगानिस्थान छाडिरहेका छन् । तालिवानको नियन्त्रणपछि पहिलो कमर्शियल उडान विहिबार कतार एयरवेजले गरेको थियो । अगस्ट ३१ मा अमेरिकी सेना फिर्ता भएपछि काबुल बिमानस्थल बन्द रहेको थियो ।
काबुलमा रहेका ३४ नेपालीहरु यस अगाडिको उडानमा छुटेका थिए । उनीहरु सुरक्षित रुपमा नै त्यहाँ रहेको जनाइएको छ । निजी सेक्युरिटी कम्पनीको चार्टर्ड उडानमा नेपाली नागरिकहरू फर्काउन दूतावासले पहल गरिरहेको छ।
संयुक्त राष्ट्रसङ्घ अन्तर्गतका विभिन्न निकायमा कार्यरत ४६७ नेपालीमध्ये ४२४ जना अफगानिस्तानमा नै रहेका छन् । ४३ जना नेपालीहरु भने विदामा आएका थिए । बिदामा आउन चाहेका थप १ सय जना नेपालीलाई पनि नेपाल ल्याउने पहल भइरहेको छ ।
नेपाली नागरिकहरूका लागि जोखिम कायमै रहेकाले अफगानिस्तानबाट बिदामा आएकालाई अहिले नै फर्किन सहमति दिन नसकिने वैदेशिक रोजगार विभागको भनाई छ ।