साढे ४ महिनापछि पशुपतिनाथ मन्दिर भक्तजनका लागि खुला, दर्शनका लागि मापदण्ड यस्ता
प्रकाशित मिति : भाद्र २५, २०७८ शुक्रबार
कोरोनाको महामारीका कारण वैशाख १० गते शुक्रबारदेखि भक्तजनका लागि बन्द गरिएको पशुपतिनाथको मूल मन्दिर आजदेखि खुला गरिएको छ । नयाँ भेरियन्टसहितको कोरोनाको महामारी बढ्दै गएपछि पशुपतिनाथ मन्दिर भक्तजनका लागि बन्द गरिएको थियो ।
भक्तजनका लागि मन्दिर बन्द गर्नु परेकामा माफी माग्दै बिहिबार क्षमा पूजा गरिएको थियो । पशुपति क्षेत्र विकास कोषको आयोजनामा क्षमा पूजा गरेपछि शुक्रबार बिहान साढे ५ बजेदेखि भक्तजनका लागि मन्दिर खुला गरिएको हो। मन्दिर दिउँसो एक बजेसम्ममात्र खुला गरिने छ।
पशुपतिनाथ मन्दिर दर्शन गर्न जान चाहने भक्तजनले अनिवार्यरूपमा मास्क लगाउनुपर्ने छ। एकपटकमा २५ जना भक्तजनलाई मात्र मन्दिर प्रवेश गराइने छ।
मन्दिर प्रवेशका लागि भक्तजनले भौतिक दूरी कायम गरेर लाइनमा बस्नुपर्ने छ। एउटा ढोकाबाट मन्दिर प्रवेश गरेपछि अर्को ढोकाबाट निस्कने व्यवस्था मिलाइएको छ। विशेष पूजा भने खुला गरिएको छैन ।
२०७६ चैत महिनामा नेपालमा पहिलोपटक कोरोना महामारी फैलिन थालेपछि नौ महिनासम्म पशुपतिनाथ मन्दिर भक्तजनका लागि बन्द गरिएको थियो।
२०७६ साल चैत ११ गतेदेखि बन्द गरिएको मन्दिर २०७७ पुस १ गतेदेखि बिहान ६ बजेदेखि दिउँसो १ बजेसम्म खुला गरिएको थियो। विशेष पूजा भने फागुन २५ गते महाशिवरात्रिदेखि मात्र शुरु गरिएको थियो।
महाशिवरात्रिका अवसरमा गत वर्ष फागुन २७ गतेदेखि मात्र साविकबमोजिम नै पूरा समय पशुपतिनाथ मन्दिर खुला गरिएको थियो।
यसपटक पनि कोरोना जोखिमको मात्रा हेरेर विशेष पूजा, साविकबमोजिम नै मन्दिर खुलालगायत निर्णय गरिने कोषले जनाएको छ।
कोरोना महामारीका कारण २०७७ र २०७८ को साउन एवं हरितालिका पर्वमा पनि पशुपतिनाथ मूल मन्दिर बन्द भएको छ। शुक्रबारदेखि पशुपतिनाथसँगै पशुपति क्षेत्रका गुह्येश्वरीलगायत मन्दिर पनि भक्तजनका लागि खुला गरिएको छ ।