युएससीआईएसमा बायोमेट्रिक अप्वाइन्टमेन्ट छुट्यो, अब के गर्ने ?
प्रकाशित मिति : भाद्र २४, २०७८ बिहीबार
अमेरिकामा युएससीआईएसमा तपाईले ग्रिनकार्ड, नागरिकता वा अन्य कुनै अध्यागमन सुविधाका लागि आवेदन दिनुभएको छ भने बायोमेट्रिक दिनु आवश्यक हुन्छ । युएससीआईएसले तपाईलाई कुन दिन, कुन समयमा कुन केन्द्रमा उपस्थीत हुने भन्ने विवरणसहित बायोमेट्रिकको सुचना पठाएको हुन्छ ।
तर तपाई कुनै कारणवश उक्त दिन उपस्थीत हुन सक्नुभएन भने तपाईले केही कदम चाल्न आवश्यक हुन्छ । अन्यथा युएससीआईएसले आवेदन त्यागेको ठहर गर्दै अस्वीकार गर्ने सम्भावना रहन्छ । बायोमेट्रिक अप्वाइन्टमेन्ट तय भएको दिनमा उपस्थीत हुन नसक्ने भएमा सकभर त्यसको जानकारी युएससीआईएसलाई उक्त मिति अगाडि नै दिनुपर्छ ।
युएससीआईएसले गत मे देखि लागु हुनेगरी फोन मार्फत नै बायोमेट्रिकको नयाँ मिति अनुरोध गर्न सकिने व्यवस्था गरेको छ । विगतमा नयाँ मितिका लागि लिखित रुपमा नै अनुरोध गर्नुपर्ने प्रावधान भएपनि मे देखि युएससीआईएसको सम्पर्क केन्द्रको ८०० ३७५ ५२८३ नम्बरमा फोन गरेर बायोमेट्रिकका लागि नयाँ मिति अनुरोध गर्न सकिने भएको छ । तर अनुरोध गर्दा नयाँ मिति अनुरोध गर्नुपर्नाको राम्रो कारण बताउन आवश्यक हुन्छ ।
बायोमेट्रिकका लागि तय भएको मितिमा कुनै कारणवश उपस्थीत हुन नसकेमा वा उक्त मिति भन्दा अगाडि युएससीआईएसलाई नयाँ मितिका लागि सम्पर्क गर्न नसकेमा तपाईले तत्कालै बायोमेट्रिकका लागि तय भएको आवेदन सहायता केन्द्रमा गएर यसबारे जानकारी गराउन सक्नुहुनेछ । तपाईले बायोमेट्रिकको मिति किन छुटाउनुभयो भन्ने अधिकारीलाई जानकारी गराउनुपर्छ । मिति गुज्रेको धेरै दिन नभएको खण्डमा आवेदन सहायता केन्द्रका अधिकारीले तपाईको बायोमेट्रिक लिनसक्छन् । वा नयाँ मिति दिन सक्छन् । तर यसरी जाँदा तपाईको बायोमेट्रिक लिने ग्यारेन्टी नै भने हुँदैन ।
यदि तपाईको बायोमेट्रिकको मिति गुज्रिसकेको छ र तपाई आवेदन सहायता केन्द्रमा जानसक्ने अवस्था पनि छैन भने तपाईले तत्कालै युएससीआईएसको सम्पर्क केन्द्रमा फोन गरेर यसबारे जानकारी दिनुपर्छ । राम्रो कारण पेश गर्न सकेको खण्डमा युएससीआईएसले बायोमेट्रिकको नयाँ मितिसहितको पत्र पठाउनेछ ।