अक्टोबर १ देखि भारतबाट नेपालमा हरेकपल्ट दुई लाख भारतीय रुपैयाँसम्म पठाउन पाइने
प्रकाशित मिति : भाद्र १९, २०७८ शनिबार
अक्टोबर १ देखि लागु हुनेगरी भारतबाट नेपालमा हरेकपल्ट दुई लाख भारतीय रुपैयाँसम्म पठाउन पाइने भएको छ । रिजर्भ बैङ्क अफ इन्डियाले विद्युतीय माध्यममार्फत् पैसा पठाउँदा एकपटकमा दुई लाख भारतीय रुपैयाँसम्म पठाउन पाइने व्यवस्था गर्न लागेको हो ।
अहिलेसम्म एकपटकमा ५० हजासम्म, वार्षिक १२ पटक र बर्षमा ६ लाखसम्म मात्र रेमिट्यान्स कारोबार गर्न पाउने व्यवस्था रहेको छ । नेशनल इलेकट्रोनिक फन्ड्स ट्रान्स्फर मार्फत् नेपाल भारत रेमिट्यान्स कारोबार हुँदै आएको छ। उक्त नियम अनुसार एनईएफटी आबद्ध बैङ्कहरूमा खाता भएका व्यक्तिले वार्षिक १२ पटकसम्म रेमिट्यान्स पठाउन पाउने प्रावधान छ।
नयाँ नियम भारतीय बैङ्कमा खाता हुनेहरुका सन्दर्भमा मात्र लागु हुनेछ । खाता नहुने ग्राहकहरूको हकमा भने अहिलेकै नियम कायम रहने अर्थात् एकपटकमा ५० हजार भारतीय रुपैयाभन्दा बढी पठाउन नपाइने जनाइएको छ ।
नेपालमा कुल रेमिट्यान्सको करिब १२ प्रतिशत भारतबाट आउने गरेको छ । तर कानूनी रुपमा रकम पठाउनमा लगाइएको सिमाहरुका कारण नेपालीहरुले हुण्डी लगायतको प्रयोग गर्दै आएका छन् ।