दुईसातामा झण्डै २४ हजार अफगानीहरु अमेरिका प्रवेश, ८ वटा सैन्य क्याम्पमा आवास
प्रकाशित मिति : भाद्र १७, २०७८ बिहीबार
दुईसाताको अवधिमा झण्डै २४ हजार अफगानीहरु अमेरिका प्रवेश गरेका छन् । अगस्त १७ देखि अगस्त ३१ सम्म उद्दार उडानहरु संचालन भइरहँदा उनीहरु ती उडानहरुमार्फत अमेरिका प्रवेश गरेका हुन् ।
अमेरिकी सरकारको विदेशमन्त्रालयले यसअगाडि अफगानिस्तानबाट उद्दारका क्रममा अमेरिका आएका अफगानीहरुको यकिन संख्या सार्वजनिक गरेको थिएन । विदेशमन्त्रालयका प्रवक्ता नेड प्राइसले अगस्त १७ देखि ३१ सम्म ३१ हजार १ सय ७ को उद्दार गरिएकोमा २३ हजार ८ सय ७६ जना अफगानी रहेको बताएका छन् ।
यसरी अमेरिका आएका अफगानीहरुमध्ये कतिजनाले विशेष आप्रवासी भिसा वा अन्य भिसा लिएर आएका थिए भन्नेबारे केही खुलाइएको छैन । तर भिसा प्रकृयामा समय लाग्ने भन्दै भिसाको प्रकृया पूरा नभएका वा सुरु नगरेका कैयन अफगानीहरुलाई २ बर्षको अस्थायी संरक्षणसहित अमेरिका प्रवेशको अनुमति दिइएको थियो ।
उद्दार गरिएका अरु ४ हजार ४ सय ४६ जना भने अमेरिकनहरु हुन् । अन्य व्यक्तिहरु अमेरिकाको ग्रिनकार्डवाहक भएको जनाइएको छ । अमेरिका र सहयोगीहरुले जुलाईको अन्तिमदेखि अगस्तको अन्तिमसम्म अफगानिस्तानबाट ७७८ वटा उडानमार्फत १ लाख २४ हजारभन्दा धेरैको उद्दार गरेका थिए ।
अफगानिस्तानबाट उद्दार गरेर ल्याइएका अफगानीहरुलाई अहिले अमेरिकाका विभिन्न ८ सैन्य क्याम्पहरुमा आवासको व्यवस्था गरिएको छ । जसमध्ये भर्जिनियाको फोर्ट ली, विसकन्सिनको फोर्ट म्याक्वे, टेक्सासको फोर्ट ब्लीस र न्युजर्सीको सैन्य क्याम्प समेत रहेका छन् । गत मंगलबार अमेरिकाले अफगानिस्तानमा झण्डै २० बर्ष लामो युद्ध समाप्त गरेको थियो ।