जापानबाट आइपुग्यो थप साढे ५ लाख डोज एस्ट्राजेनेका, प्रदेश १ र २ का ज्येष्ठ नागरिकलाई लगाइने
प्रकाशित मिति : भाद्र ७, २०७८ सोमबार
जापानबाट थप ५ लाख ५९ हजार डोज एस्ट्राजेनेका खोप सोमबार नेपाल आइपुगेको छ। यो खोप जापान सरकारले कोभ्याक्स सुविधामार्फत् अनुदानमा उपलब्ध गराएको हो।
योसँगै जापानबाट अनुदानमा उपलब्ध गराउने भनिएको १६ लाख १४ हजार ७४० डोज खोप नेपाल आइसकेको स्वास्थ्य तथा जनसंख्या मन्त्रालयले जनाएको छ।
यसअघि साउन २३ र २४ गते ९ लाख डोज र यही भदौ ५ गते २ लाख ८ हजार ७०० डोज खोप जापानबाट आएको थियो। यो खोप प्रदेश १ र २ का ज्येष्ठ नागरिकलाई लगाइने जनाइएको छ। गत फागुनमा कोभिसिल्ड लगाएका ६५ वर्षभन्दा माथिका ज्येष्ठ नागरिकलाई मन्त्रालयले एस्ट्राजेनेका खोप लगाइरहेको छ। भारतबाट खरिद गरिएको कोभिसिल्ड खोप नआएपछि सरकारले जापानबाट अनुदानमा एस्ट्राजेनेका खोप ल्याएको हो।
यसैगरी चीनबाट अनुदानमा थप १६ लाख डोज भेरोसेल खोपसमेत चाँडै नै आउने मन्त्रालयले जनाएको छ। यो खोप ५० वर्ष मुनिका र प्राथमिकतामा परेकालाई लगाइने जनाइएको छ।
नेपालमा अहिलेसम्म करिब १ करोड ४० लाख डोज खोप आइसकेको छ। अहिलेसम्म ४९ लाख ४२ लाख २५० जनाले पहिलो डोज र ३८ लाख ४६ हजार ७३६ जनाले पूर्ण डोज खोप लगाइसकेका छन्।