अफगानिस्तानबाट ५०४ नेपाली स्वदेश फर्किए, कन्सुलर विभागमा ३५४ नेपालीको विवरण दर्ता
प्रकाशित मिति : भाद्र ६, २०७८ आईतबार
अफगानिस्तानबाट उद्धार भएका नेपालीहरू स्वदेश फर्कने क्रम जारी छ। हालसम्म ५०४ नेपाली काठमाडाैं आइसकेकाे र अफगानिस्तानबाट उद्धार भई दोहा, दुबई, लण्डन र नयाँदिल्लीमा रहेका नेपालीलाई ल्याउन समन्वय र सहजीकरण भइरहेको परराष्ट्र मन्त्रालयले जनाएकाे छ।
यस्तै परराष्ट्रकाे कन्सुलर सेवा विभागको वेव पोर्टलमा आइतबार साँझसम्म ३५६ नेपालीहरूले आफ्नो विवरण दर्ता गराएका छन्।
अफगानिस्तानमा विकसित पछिल्लो घट्नाक्रमका कारण त्यहाँ रहेका नेपालीको अवस्था यकिन गरी आवश्यक समन्वयका साथ उद्धारका कार्य गर्न मन्त्रालयका मध्य एशिया, पश्चिम एशिया तथा अफ्रिका महाशाखाका प्रमुखको संयोजकत्वमा गठित अन्तर निकाय कार्यदलकाे सातौं बैठक आइतबार बसेकाे छ। बैठकले त्यहाँबाट उद्दार गर्न बाँकी नेपाली नागरिकको अवस्था, मित्र राष्ट्रहरुसँगको समन्वय, उद्दारपछिको स्वदेश फिर्तिलगायतबारे अद्यावधिक र पछिल्लो अवस्था बारेमा छलफल भएकाे परराष्ट्रले जनाएकाे छ।
उद्धारका लागि सूचीकृत भएकामध्ये नाम र राहदानी नम्बर दोहोरिएको, एकै जनाको धेरै ठाउँबाट विवरण भरिएको र उद्दार भई सुरक्षित गन्तव्यसम्म पुगिसकेकाहरुकाे विवरण रुजु गरी उद्धार हुन बाँकीको विवरण स्थानगत रूपमा समेत अद्यावधिक गरी उद्धारका लागि हाल उद्धार उडान गरिरहेका मित्रराष्ट्रहरूसँग सहकार्य र समन्वय भइरहेको जनाइएकाे छ।
काबुलमा नागरिक उड्डयन सेवाको हवाई जहाजको आगमन अवतरण खुली नसकेको मन्त्रालयले उल्लेख गरेको छ
अफगानिस्तानमा नै रहेका र आफ्नो नाम दर्ता नगराएकाहरुले आफै वा परिवारजनले कन्सुलर सेवा विभागको वेबसाइट https://nepalconsular.gov.np/ अनलाईन पोर्टलमा रहेको नामसहितको विवरण दर्ता गर्न तथा भाइबर र ह्वाट्स एपसुविधा सहितको मोवाइल नम्वरहरू +९७७ ९७४९३२६४५८ (कन्सुलर सेवा विभाग), +९७७ ९७४९३२६४५९ (परराष्ट्र मन्त्रालय), +९७७ ९८४१ ७९२७७४ (सिचुएसन रुम, परराष्ट्र मन्त्रालय) र +९१ ८९२९६०१९२५ (नेपाली राजदूतावास, नयाँ दिल्ली) प्रयोग गरी विवरण टिपाउन मन्त्रालयले अनुरोध गरेकाे छ।
साथै, नाम टिपाएकामध्ये उद्धार भई सुरक्षित गन्तव्यमा पुगेपछि दिइएकाे फोन नम्बर, भाइबर र ह्वाट्स एप वा अनलाइन पोर्टलबाट जानकारी गराउनसमेत परराष्ट्रले अनुरोध गरेकाे छ।