कूटनीतिक नियोग र कर्मचारीको घरभाडाका लागि एक वर्षमा ८१ करोडभन्दा बढी खर्च
प्रकाशित मिति : भाद्र ४, २०७८ शुक्रबार
विदेशस्थित कूटनीतिक नियोग कार्यालय र कर्मचारी आवासका लागि घरभाडावापत् नेपाल सरकारले यो वर्ष ८१ करोडभन्दा बढी खर्च गरेको छ।
महालेखा परीक्षकको प्रतिवेदन २०७८ का अनुसार घरभाडावापत् ८१ करोड १० लाख रुपैयाँ खर्च भएको हो। जुन नियोगको चालु खर्चको २९.३४ प्रतिशत हो।
कर्मचारी आवासका लागि लिइएइको घरमा उपलब्ध गराइएको सुविधा र भाडा रकमसम्बन्धी मापदण्डमा पनि विविधता देखिएको महालेखाको भनाइ छ। यसका लागि स्पष्ट मापदण्डसहितको नीति बनाई कार्यान्वयन गर्न संसदको सार्वजनिक लेखा समितिले २०६९ वैशाख ५गते परराष्ट्र मन्त्रालयलाई निर्देशन दिए पनि हालसम्म कार्यान्वयन हुन सकेको छैन।
मन्त्रिपरिषद्को २०५१ जेठ २३ को निर्णयमा नियोग प्रमुख, अन्य कर्मचारी र निजका आश्रित परिवार तथा निजी कामदारको स्वास्थ्य बिमा र बिमकले आफैंले तिर्नुपर्ने शुल्क वा कमिसन भएमा सोसमेत नेपाल सरकारले बेहोर्ने उल्लेख छ।
बिमा हुन नसक्ने भएमा मन्त्रालयको पूर्वस्वीकृति लिइ गराइएको स्वास्थ्योपचारमा लागेको खर्च रकम नेपाल सरकारले बेहोर्ने उल्लेख छ। यो वर्ष विदेशस्थित ३९ कूटनीतिक नियोगले नियोग प्रमुख, कूटनीतिक कर्मचारी, आश्रित परिवार र निजी कामदारको स्वास्थ्य बिमा तथा उपचार खर्चका लागि २० करोड १६ लाख १३ हजार खर्च भएको देखिएको छ।