अब ग्रिनकार्ड आवेदन दिंदा आवश्यक मेडिकल रिपोर्टको म्याद ४ बर्ष
प्रकाशित मिति : श्रावण ३१, २०७८ आईतबार
अमेरिकामा युएससीआईएसले मेडिकल रिपोर्टको म्याद २ बर्षबाट बढाएर ४ बर्ष बनाएको छ । ग्रिनकार्ड आवेदन दिंदा आवश्यक मेडिकल रिपोर्टको २ बर्षे म्याद ग्रिनकार्डबारे निर्णय नगर्दै सकिने अवस्था आएपछि युएससीआईएसले मेडिकल रिपोर्टको म्याद बढाएको हो ।
युएससीआईएसको नयाँ नियमसँगै ग्रिनकार्ड आवेदन आई ४८५ दुईबर्षभन्दा लामो समय पेन्डिङ रहेको अवस्थामा नयाँ मेडिकल रिपोर्ट पेश गर्नुपर्ने झन्झटबाट आवेदकहरु मुक्त भएका छन् । अमेरिकामा आप्रवासी भिसा वा ग्रिनकार्ड आवेदन दिंदा स्वास्थ्य परीक्षण र भ्याक्सिनको रेकर्ड उल्लेख भएको मेडिकल रिपोर्ट आई ६९३ पेश गर्न आवश्यक हुन्छ ।
सामान्यतया स्वास्थ्यको आधारमा अमेरिकाको आप्रवासी सुविधाका लागि आवेदक अयोग्य नरहेको प्रमाणका रुपमा मेडिकल रिपोर्ट पेश गरिन्छ । यो रिपोर्ट सिभिल सर्जनले हस्ताक्षर गरेको मितिले २ बर्षसम्म मान्य हुने प्रावधान अहिलेसम्म रहेको छ । तर आवेदकले ग्रिनकार्ड आवेदन आई ४८५ पेश गर्दाको मितिले ६० दिन भित्रैको रिपोर्टमात्र मान्य हुन्छ ।
कोरोनाको महामारी कारण ग्रिनकार्ड आवेदन प्रकृयामा ढिलाई भएको भन्दै अगस्त १२ देखि नै लागु हुने गरी युएससीआईएसले नयाँ नियम ल्याएको हो । आवेदनमा निर्णय गर्न ढिलो हुँदा आवेदकले नयाँ मेडिकल रिपोर्ट पेश गर्ने अवस्थालाई सम्बोधन गर्नका लागि युएससीआईएसले मेडिकल रिपोर्टको म्याद अस्थायी रुपमा बढाउने नियम ल्याएको जनाएको छ ।
तर मेडिकल रिपोर्टको म्याद आगामी सेप्टेम्बर ३० सम्मका लागिमात्र ४ बर्षसम्म कायम हुनेगरी बढाइएको हो । यदि सिभिल सर्जनले हस्ताक्षर गरेको ४ बर्ष नाघेको छैन र आई ४८५ आवेदन दिनु अगाडि ६० दिन ननाघेको अवस्थामामात्र मेडिकल रिपोर्टलाई मान्यता दिइनेछ । सेप्टेम्बर ३०, २०२१ अगाडि निर्णय गरिने ग्रिनकार्ड आवेदन आई ४८५ आवेदनका सन्दर्भमामात्र यो नियम लागु हुनेछ ।