विश्वविद्यालयका विद्यार्थीले पाउने भए खोप
प्रकाशित मिति : श्रावण २७, २०७८ बुधबार
सरकारले विश्वविद्यालय तहका परीक्षार्थीलाई कोरोना भाइरसविरुद्धको खोप दिने भएको छ।
स्वास्थ्य तथा जनसंंख्या राज्यमन्त्री उमेश श्रेष्ठ बुधबार ट्वीट गर्दै विश्वविद्यालयका २० भन्दामाथिका विद्यार्थीलाई परिचयपत्रका आधारमा खोप दिने निर्णय गरिएको जानकारी दिएका हुन्। उनले काठमाडाैं उपत्यकामा नेपाली सेना नेपाल प्रहरी तथा सशस्त्र प्रहरी अस्पताल र चक्रपथकाे राधास्वामी आइसाेलेसन केन्द्र र सबै प्रदेशबाट परीक्षार्थीलाई खाेप वितरणकाे व्यवस्था रहेकाे जनाएका छन्।
सोमबार पाँच विद्यार्थी संगठनले मन्त्री श्रेष्ठलाई ज्ञापनपत्र बुझाउँदै विश्वविद्यालयको परीक्षामा सहभागी विद्यार्थीलाई प्रवेशपत्रका आधारमा कोरोना भाइरसविरुद्धको खोप लगाउन माग गरेका थिए ।
मन्त्रालयका अनुसार त्रिभुवन विश्वविद्यालयसहित अन्य विश्वविद्यालयका परीक्षा दिने तयारीमा रहेका ६० हजार विद्यार्थीलाई खोप प्रदान गरिनेछ।
फागुनसम्म ५ करोड खोप ल्याइनेछः मन्त्रालय
यसैबीच, स्वास्थ्य तथा जनसंख्या मन्त्रालयले फागुनसम्म कोरोना विरुद्धको ५ करोड २२ लाख डोज खोप ल्याउने प्रक्रियामा रहेको जनाएको छ।
मन्त्रालयका प्रवक्ता डा कृष्ण पौडेलले सरकार फागुन मसान्तसम्म ५ करोडभन्दा बढी खोप ल्याउने तयारीमा जुटेको जनाएका छन्। उनका अनुसार हालसम्म नेपालले अनुदान तथा खरिद गरेर १ करोड ८ लाख ६० हजार १७० डोज प्राप्त गरेको छ।
असोज मसान्तसम्म करिब एक तिहाई जनसंख्यालाई खोप दिइसक्ने मन्त्रालयले जनाएको छ। असोज मसान्तसम्म १ करोड २ लाख खोप ल्याउने तयारी भएको उनले बताए।
‘हामीले असोज मसान्तसम्म एक तिहाई जनसंख्यालाई खोप दिइसक्ने तयारी गरेका छौं,’ डा पौडेलले भने, ‘ ‘सरकार खोपलाई प्राथमिकतामा राखि खरिद गर्न लागिपरेको छ।’
मन्त्रालयको तथ्यांक अनुसार हालसम्म ४५ लाख ४१ हजार ६८२ पहिलो डोज खोप प्राप्त गरेका छन् भने २७ लाख २१ हजार ७ सय ८२ जनाले दवै डोज लगाइसकेका छन्।
सरकारले कुल जनसंख्याको ७२ प्रतिशत अर्थात २ करोड १७ लाख ५६ हजार ७६३ लाई कोभिड खोप लगाउने लक्ष्य लिएको छ। जसमध्ये हालसम्म २१ दशमलब १ प्रतिशतले पहिलो डोज र १३ दशमलब २८ प्रतिशतले दोस्रो डोज खोप पाएका छन्।