कक्षा १२ को परीक्षा स्थगित, यी वेबसाइटबाट हेर्न सकिन्छ एसइईको रिजल्ट
प्रकाशित मिति : श्रावण २३, २०७८ शनिबार
राष्ट्रिय परीक्षा बोर्डले कक्षा १२ को परीक्षा स्थगित गरेको छ। शनिबार बसेको बोर्ड बैठकले साउन ३१ गतेबाट हुने परीक्षा स्थगित गर्ने निर्णय गरेको हो। यसअघि स्वास्थ्य मन्त्रालयले बोर्डलाई परीक्षा स्थगनको सिफारिस गरेको थियो।
परिस्थिति अनुकूल भएपछि पुनः परीक्षा सञ्चालन गर्ने निर्णयसमेत बोर्डले गरेको छ । पुनः हुने परीक्षाबारे १५ दिन अघि जानकारी दिने बोर्डले जनाएको छ।
गत वर्ष कक्षा १२ को परीक्षा मंसिरमा सञ्चालन भएको थियो ।
यहाँ हेर्न सकिन्छ एसइईको रिजल्ट
राष्ट्रिय परीक्षा बोर्डले २०७७ सालको माध्यमिक शिक्षा परीक्षा (एसइई) को नतिजा प्रकाशित गरेको छ। विद्यालयले गरेको आन्तरिक मूल्यांकनका आधारमा बोर्डले नतिजा सार्वजनिक गरेको हो। यसवर्ष ५ लाख १७ हजार विद्यार्थीले एसइई दिएका थिए।
दोस्रो लहरको कोभिड–१९ संक्रमण बढ्दै गएपछि गरिएको निषेधाज्ञाका कारण गत वैशाख २७ गते एसइई परीक्षा स्थगित भएको थियो। गत जेठ १३ देखि भौतिकरूपमा एसइई परीक्षा सञ्चालन गर्ने गरी बोर्डले तालिका सार्वजनिक गरे पनि कोभिडकै कारण परीक्षा हुन नसकेपछि जेठ १७ गते बसेको मन्त्रिपरिषद बैठकले आन्तरिक मूल्याङ्कनबाट नतिजा प्रकाशित गर्ने निर्णय गरेको थियो।
www.see.gov.np, www.neb.gov.np, www.see.edusanjal.com, www.see.ntc.net.np, www.ncell.axiata.com बाट एसइईको नतिजा थाहा पाउन सकिन्छ।