स्वास्थ्य मन्त्रालयको प्रक्षेपणः मंसिरसम्म २ लाख कोरोना संक्रमित थपिने
प्रकाशित मिति : श्रावण २१, २०७८ बिहीबार
स्वास्थ्य तथा जनसंख्या मन्त्रालयले आगामी मंसिरसम्म करिब २ लाख कोरोना संक्रमित थपिने प्रक्षेपण गरेको छ। प्रतिनिधिसभाको स्वास्थ्य तथा शिक्षा समितिको बिहीबारको बैठकमा स्वास्थ्य मन्त्रालयअन्तर्गतको नीति, योजना तथा अनुगमन महाशाखाका प्रमुख डा। गुणराज लोहनीले मंसिरसम्म १ लाख ९३ हजार ८ सय ५६ संक्रमित थपिने अनुमान प्रस्तुत गरेका हुन्।
मन्त्रालयले गरेको प्रक्षेपण अनुसार साउनमा संक्रमण दर बढे पनि त्यसपछि भने अस्पताल भर्ना हुने र गम्भीर बिरामीको संख्या बिस्तारै घट्दै जानेछ।
मंसिरसम्ममा १ लाख ९३ हजार ८ सय ५६ संक्रमित थपिने सम्भावना छ। ३८ हजार ७ सय ७१ जनालाई उपचार सेवा आवश्यक पर्ने र ९ हजार ६ सय ९३ जनालाई सघन उपचार आवश्यक पर्न सक्ने सम्भावना रहेको मन्त्रालयले जनाएको छ।
जसअनुसार साउनमा ५३ हजार ३ सय ७, भदौमा ४५ हजार ७ सय २६, असोजमा ३८ हजार ५ सय ९७, कात्तिकमा ३१ हजार ४४ र मसिंरमा २५ हजार १ सय ८३ संक्रमित थपिने मन्त्रालयले जनाएको छ।
त्यसैगरी, ५ महिना अवधिमा ९ हजार ६९३ जनालाई सघन उपचार कक्षको आवश्यकता पर्ने मन्त्रालयको आँकलन छ।
साउनमा २ हजार ६६५, भदौमा २ हजार २८६, असोजमा १ हजार ९३०, कार्तिकमा १ हजार ५५२, मंसिरमा १ हजार २५९ जनालाई सघन उपचार आवश्यक पर्ने सम्भावना रहेको मन्त्रालयले जनाएको छ।