आवेदनको चाप बढेपछि युएससीआईएसले खोल्यो नयाँ एसाइलम अफिस, अमेरिकाभित्र ११ औं
प्रकाशित मिति : श्रावण १८, २०७८ सोमबार
अमेरिकामा एसाइलमका आवेदनको चाप बढेपछि युएससीआईएसले नयाँ एसाइलम अफिस खोलेको छ । सोमबारदेखि फ्लोरिडाको तम्पामा खोलिएको यो एसाइलम अफिस अमेरिकाभित्रको ११ औं एसाइलम अफिस हो ।
फ्लोरिडामा खोलिएको यो दोश्रो एसाइलम अफिस हो । फ्लोरिडा राज्यको मायामी र तम्पाका एसाइलम अफिसहरुले अब कार्यविभाजन गर्ने भएका छन् । खासगरी फ्लोरिडामा एसाइलमको चाप बढेपछि त्यसलाई कम गर्न यो अफिस खोलिएको हो भने यसको कार्यक्षेत्र फ्लोरिडामात्र रहनेछ ।
अहिले एसाइलमका आवेदन प्राप्त हुनेमा फ्लोरिडा अमेरिकामा नै अग्रपंक्तिमा रहेको छ । देशभर पेन्डिङ रहेका झण्डै चौथाई आवेदनहरु फ्लोरिडाबासी एसाइलम आवेदकका रहेका छन् ।
अमेरिका आएको सामान्यतया एकबर्षभित्र शरणको माग गर्दै अमेरिकामा दिइएका एसाइलम आवेदनबारे प्रारम्भिक फैसला युएससीआईएसले गर्दै आएको छ । एसाइलम अफिसरले आवेदक शरणका लागि योग्य भए नभएको निर्धारण गर्न अन्तरवार्ता लिन्छन् । योग्य भएको खण्डमा शरण प्रदान गरिन्छ । शरण स्वीकृत भएको एकबर्षपछि ग्रिनकार्ड आवेदन दिन सकिन्छ ।
तम्पाको एसाइलम अफिसले खासगरी पश्चिम र उत्तर फ्लोरिडाका आवेदकले दिएका आवेदनबारे निर्णय गर्नेछ । त्यस्तै मध्य फ्लोरिडाका केही भागका आवेदन पनि हेर्नेछ । मायामी अफिसले मध्य फ्लोरिडाका केही भाग र दक्षिण फ्लोरिडाका आवेदकका आवेदन हेर्नेछ ।
यी बाहेक अमेरिकामा आर्लिंगटन, शिकागो, ह्युस्टन, न्यु ओर्लियन्स, लासभेगास, नेवार्क, बोस्टन, न्युयोर्क र सान फ्रान्सिस्कोमा एसाइलम अफिसहरु रहेका छन् ।