सरकारले बालबालिकाका लागि १८० भेन्टिलेटरसहितको २५० आइसीयु बेड थप्दै
प्रकाशित मिति : श्रावण १५, २०७८ शुक्रबार
कोरोना संक्रमणको तेस्रो लहरको तयारीस्वरुप सरकारले बालबालिकाका लागि १८० भेन्टिलेटरसहितको २५० आइसीयु बेड थप्ने भएको छ। स्वास्थ्य मन्त्रालयका प्रवक्ता कृष्णप्रसाद पौडेलले शुक्रबार विज्ञप्ति जारी गर्दै सरकारले विस्तार गर्ने भौतिक पूर्वाधारका बारेमा जानकारी दिएका हुन्।
उपचारात्मक सेवा विस्तारका लागि हाइडिपेन्डेन्सी युनिट (एचडीयु) बेड देशभरका सरकारी अस्पतालहरुमा २०७५ र निजीमा ७७८ थप गरी सञ्चालनमा रहेको र १४०० थप गर्ने प्रक्रिया अगाडि बढेको मन्त्रालयका जनाएको छ।
यस्तै, भेन्टिलेटरहरुको संख्या ९०४ पुर्याइएको छ भने १८० थप गर्ने प्रक्रियामा रहेको छ। अक्सिजन आपूर्ति सुदृढ गर्नका लागि सरकारले सघन कार्यहरुमार्फत् ५५०० अक्सिजन कन्सन्ट्रेटर ल्याइसकेको र थप ३५०० आउने क्रममा रहेको जनाइएको छ। यस्तै, ६३७७ अक्सिजन सिलिण्डर थप गरिएको छ।
‘तेस्रो लहर रोक्न र त्यसबाट हुनसक्ने क्षति कम गर्न हामी सबैको सामूहिक प्रयास र हाम्रा गतिविधिहरुमा जनस्वास्थ्य मापदण्डको पालनाको महत्वपूर्ण भूमिका हुने पनि पुनः स्मरण गराउन चाहन्छौं,’ प्रवक्ता पौडेलले भनेका छन्।
यस्तै, आगामी असोज मसान्तसम्म कूल १ करोड ८३ लाख ८२ हजार ८५० डोज प्राप्त हुने आँकलन गरी कोभिडविरुद्धको खोप विस्तार हुने मन्त्रालयले जनाएको छ।
यस्तै, कोभ्याक्सबाट लागत सहभागितामा खरिद गरी १ करोड ५० लाख डोज र १२ वर्षमाथिका बालबालिकालाई ६० लाख डोज फाइजर खोपका लागि सकारात्मक रुपमा कार्य अगाडि बढिरहेको जनाइएको छ।
गाभी कोभ्याक्सबाट निःशुल्क २० प्रतिशत जनसंख्याका लागि प्राप्त हुने १ करोड १३ लाख डोज पनि क्रमशः प्राप्त हुँदै जाँदा चैत मसान्तसम्म खोप सम्पूर्ण नेपालीको पहुँचमा पुग्ने पनि प्रवक्ता पौडेलले उल्लेख गरेका छन्।