कांग्रेसमा क्रियाशील सदस्यताको विवाद टुंगो लगाउने जिम्मा केन्द्रीय नेताहरुलाई
प्रकाशित मिति : श्रावण १४, २०७८ बिहीबार
नेपाली कांग्रेसले केही जिल्ला तथा क्षेत्रमा देखा परेका क्रियाशील सदस्यताको विवादलाई टुंगो लगाउने जिम्मा केन्द्रीय नेताहरुलाई दिएको छ।
बिहीबार प्रधानमन्त्री शेरबहादुर देउवानिवास बुढानीलकण्ठमा बसेको पदाधिकारी तथा पूर्वपदाधिकारी बैठकले क्रियाशील सदस्यतासम्बन्धमा देखिएका विवाद समाधान गर्न केन्द्रीय नेताहरुलाई ५ दिनको समय दिएको हो।
‘हामीले केन्द्रीय नेताहरुको तहबाट निर्णय गर्ने केही विषय पहिचान गरेका छौं, अब उहाँहरुले छलफल गरेर निर्णय दिएपछि निर्वाचनसम्बन्धी अन्य प्रक्रिया अघि बढ्छ,’ बैठकपछि क्रियाशील सदस्यता छानबिन समितिका सदस्य रमेश लेखकले सञ्चारकर्मीहरुसँग भने।
अन्य पार्टीबाट समायोजन भएका नेता तथा कार्यकर्तालाई दिइने क्रियाशील सदस्यता, सप्तरी, बारा, सिन्धुपाल्चोक तथा रसुवा र सर्लाही ४ तथा धनुषा २ का देखिएको विवाद समाधान गर्ने जिम्मा समितिले केन्द्रीय नेताहरुलाई दिएको नेता लेखकले बताए।
सोहीअनुसार अब शीर्ष नेताहरुको बैठक शुक्रबार नै बस्ने भएको छ। बैठकले क्रियाशील सदस्यता विवाद टुंगो लगाउनेबारे निर्णय लिनेछ।