नेपालमा कोरोनाः ३३६५ संक्रमित थपिए, १६ जनाको मृत्यु
प्रकाशित मिति : श्रावण १४, २०७८ बिहीबार
पछिल्लो २४ घण्टामा नेपालमा थप ३ हजार ३६५ जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयका अनुसार देशभरका विभिन्न प्रयोगशालाहरुमा गरी ९ हजार ५५५ जनाको पीसीआर र ४ हजार ६८७ जनाको एन्टिजेन विधिबाट परीक्षण गर्दा उक्त संख्यामा संक्रमण पुष्टि भएको हो।
काठमाडौं उपत्यकामा ८ सय ६० जना संक्रमित थपिएका छन्। जसमा काठमाडौंका ५९७, भक्तपुरका १०८ र ललितपुरका १५५ जना रहेका छन्।
यस्तै, उक्त अवधिमा १६ जना कोरोना संक्रमितको मृत्यु भएको मन्त्रालयले जनाएको छ। यससँगै नेपालमा हालसम्म कोरोना भाइरसको संक्रमणबाट मृत्यु हुनेको संख्या ९ हजार ८०७ पुगेको छ।
यस्तै, १ हजार ३ सय ७३ जना संक्रमणमुक्त भएका छन्। नेपालमा हालसम्म संक्रमणमुक्त हुनेको संख्या ६५०४४५ पुगेको छ। कोरोना निको हुने दर ९४ दशमलव १ प्रतिशत रहेको छ।
सबैभन्दा बढी मृत्यु हुनेमा ६० वर्षमाथिका
मन्त्रालयको तथ्यांकअनुसार कोरोना संक्रमणबाट हालसम्म सबैभन्दा बढी मृत्यु ६० वर्षदेखि माथिको उमेर समूहको भएको छ। हालसम्म उक्त समूहका ५ हजार २ सय ६४ जनाको मृत्यु भएको छ। यस्तै, ५० देखि ५९ वर्षका १९२७, ४० देखि ४९ वर्षका १४१०, ३० देखि ३९ वर्षका ८११, २० देखि २९ वर्षका २९७, १० देखि १९ वर्षका ५० र १० वर्षसम्मका ४१ जनाको मृत्यु भएकोछ ।
(यसअगाडिको समाचारमा संक्रमितको संख्या ३६६५ हुन गएकोमा सच्याइएको छ । -सम्पादक)