अब युएससीआईएसका बायोमेट्रिक अप्वाइन्टमेन्ट पत्रबाट सार्न नसकिने, फोन अनिवार्य
प्रकाशित मिति : श्रावण १३, २०७८ बुधबार
अबदेखि युएससीआईएसका बायोमेट्रिक अप्वाइन्टमेन्ट पत्रबाट पुनर्तय गर्न नसकिने भएको छ । युएससीआइएसले भर्जिनियाको अलेक्जान्द्रियामा रहेको बायोमेट्रिक प्रोसेसिङ युनिट बन्द गरेको छ ।
अबदेखि एकपटक तय भएका बायोमेट्रिक अप्वाइन्टमेन्टहरु उक्त मितिमा कुनै कारणले उपस्थीत हुन नसक्ने अवस्थाका कारण अर्को मितिमा सार्न परेमा युएससीआईएसले लिखित रुपमा गरिएका अनुरोधहरु नस्वीकार्ने भएको छ । अब अप्वाइन्टमेन्ट सार्नुपरेमा युएससीआईएसको सम्पर्क केन्द्रमा फोन नै गर्नुपर्ने युएससीआईएसले जनाएको छ ।
यो परिवर्तनले पेपरवर्कको झमेला कम गर्ने र अनुरोधहरु अझ प्रभावकारी तरिकाले व्यवस्थीत गर्न सहज हुने अपेक्षा गरिएको छ । बायोमेट्रिकको अप्वाइन्टमेन्ट सार्नका लागि ८०० ३७५ ५२८३ मा फोन गर्नुपर्नेछ । फोन गर्दा प्रतिक्षा समय भने निकै लामो समेत हुने गरेको सेवाग्राहीहरुको गुनासो छ ।
अप्वाइन्टमेन्टको मिति सार्नुपरेमा पहिले तय भएको अप्वाइन्मेन्टको मिति र समय भन्दा अगाडि नै फोन गर्नुपर्नेछ । साथै सुरुको अप्वाइन्टमेन्टमा उपस्थीत हुन नसक्नुको गतिलो कारण समेत पेश गर्नुपर्नेछ । यदि गतिलो कारण पेश गर्न नसकेको खण्डमा अप्वाइन्टमेन्टको मिति सार्ने अनुरोध अस्वीकार समेत हुनसक्नेछ ।
यदि अप्वाइन्टमेन्टको नयाँ मिति तय नभएको अवस्थामा सुरुमा तय गरिएको मिति र समयमा बायोमेट्रिकका लागि नपुगेमा आवेदकले फाइल गरेको अध्यागमन आवेदन, अनुरोध वा याचिका परित्याग गरेको ठहर गरिने युएससीआईएसले जनाएको छ । जसका कारण उक्त आवेदन, अनुरोध वा याचिका युएससीआईएसले अस्वीकार गर्नेछ ।