Follow @khasokhasmag

नेपालमा पुन: देखियाे डेल्टा प्लस भेरियन्ट, सबै उमेर समूहकालाई जोखिम


प्रकाशित मिति : श्रावण १२, २०७८ मंगलबार

नेपालमा कोरोना भाइरस (कोभिड–१९) को नयाँ म्युटेसन पुष्टि भएको छ। परीक्षण गराएका ४७ नमूनामध्ये तीन जनामा डेल्टा भेरियन्टमा उत्परिवर्तन (म्युटेसन) देखिएको हो।

स्वास्थ्य तथा जनसंख्या मन्त्रालयले मंगलबार विज्ञप्ति जारी गर्दै जेठ मध्यदेखि असार मसान्तसम्म देशका विभिन्न भागहरूबाट विभिन्न उमेर समूहका व्यक्तिबाट संकलित ४७ वटा नमूना विश्व स्वास्थ्य संगठनको नेपालस्थित कार्यालय तथा दक्षिण पूर्व एसिया क्षेत्रीय कार्यालयको सहयोग र समन्वयमा भारतको नयाँदिल्लीस्थित डब्ल्युएचओ आइडेन्टीफाइड सेन्टर अफ एक्सलेन्स इन जिनोमिक द इन्सिच्युट अफ जिनोमिक एण्ड इन्टिग्रेटिभ बायोलोजीमा सिक्वेन्सिङका लागि पठाइएको जनाएको छ।

उक्त नमूनाहरूको जिनोमिक सिक्वेन्सिङ पहिचान गर्दा ४७ वटै नमूनामा डेल्टा भेरियन्ट (बी.१.६१७.२) पुष्टि भएको छ भने तीन नमूनामा थप उत्परिर्वतन ‘के ४१७ एन म्युटेसन’ भेटिएको छ जसलाई ‘ए‌.वाई १’ नाम दिइएको मन्त्रालयले जनाएको छ।

मन्त्रालयका अनुसार हालसम्म योसहित भेरियन्ट अफ कन्सर्नका रुपमा नेपालमा अल्फा (बी.१.१.७) र डेल्टा (बी.१.६१७.२) भेरियन्ट तथा ‘भेरियन्ट अफ इन्ट्रेस्ट’ का रूपमा कप्पा भेरियन्ट (बी.१.६१७.१) पुष्टि भएको छ।

यी भेरियन्टहरू बढी संक्रामक तथा सबै उमेर समूहका व्यक्तिहरूलाई असर पार्ने विभिन्न अध्ययनबाट पाइएको स्वास्थ्य मन्त्रालयले जनाएको छ। मन्त्रालयले संक्रमण रोक्न सचेत र जिम्मेवार बनि जनस्वास्थ्यका मापदण्डहरूको पालना गर्न गराउन अनुरोध गरेको छ।

   दर्ता नम्बर: २८२९

नमस्ते मिडिया

© 2022 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com