विमानस्थलबाटै फर्काइदै भिजिटर भिसाका नेपाली कलाकार
भिजिटर भिसामा बेलायत आएर कार्यक्रम गर्न थालेपछि नेपाली कलाकारहरुलाई बेलायती अध्यागमनले बेलायत छिर्न नदिएर विमानस्थलबाटै फिर्ता पठाउन थालेको छ । कार्यक्रम गरेर अर्थोपार्जन गर्नका लागि इन्टरटेनर भिजा वा वर्क परमिट लिनुपर्नेमा भिजिटर भिसामा आएका कलाकारले कार्यक्रममा सहभागी भएर अर्थोपार्जन गरेपछि भिसाको उल्लंघन भएको भन्दै विमानस्थलबाटै फिर्ता पठाइएको हो ।
केहीदिन अगाडि बेलायतस्थित नेपाली पत्रकारहरू आपत्कालीन कोषका लागि आयोजित कार्यक्रममा सहभागी हुन नेपालबाट आउदै गरेका लोकगायक खडग गर्बुजालाई हिथ्रो विमानस्थलबाट अध्यागमन अधिकारीहरुले फिर्ता पठाइदिइको समाचारमा जनाइएको छ । गर्बुजा व्यक्तिगत स्पोन्सरसिपमा भिजिट भिसा लिएर चौथोपटक बेलायत आउँदै थिए ।
२७ वर्षदेखि नेपाली लोक संगीतमा लागेर ९ सय हाराहारी गीत गाइसकेका गर्बुजालाई बेलायत अध्यागमनले विगतमा भिजिट भिसामा आएर अर्थ आर्जन गरेको आरोप लगाउदै विमानस्थलमै रोकेको हो ।
यसअघि गायिका दुर्गा परियारलाई पनि बेलायत अध्यागमनले फर्काइदिएको थियो । भिजिट भिसा लिएर बेलायत छिर्ने अनि गाउने क्रम बढेपछि बेलायत सरकारले निगरानी बढाउन थालेको सरोकारवाला बताउँछन् । भिजिटर भिसामा प्रवेश गरेर बेलायतमा कुनै अर्थोपार्जन हुनेगरी काम गर्नु भिजिटर भिसाको उल्लंघन र गैरकानुनी मानिन्छ । तर भिजिटर भिसामा आएर पनि च्यारिटीको लागि निशुल्क गाउन भने सकिन्छ ।
कमर्सियल शोका लागि बेलायत आउँदा छोटो समयका लागि इन्टरटेनर र वर्ष दिनसम्मको टियर ५ टेम्पोररी वर्कर क्रिएटिभ एन्ड स्पोर्टिङ भिसा लिन आवश्यक छ । इन्टरटेनर भिसा दिने र नदिने कलाकारको प्रोफाइल, बैंक स्टेटमेन्ट र झिकाउने कम्पनीको प्रतिष्ठामा निर्भर हुन्छ भने टियर फाइभ भिसा कम्पनीको प्रायोजन क्षमता मूल्यांकनले मात्र दिइने जनाइएको छ ।
अमेरिकामा पनि पछिल्लो समयमा भिजिटर भिसामा आएर अर्थोपार्जन हुनेगरी कलाकारहरु कन्सर्ट र कार्यक्रममा सहभागी हुने क्रम बढेको छ । जुन भिजिटर भिसाको उल्लंघन हो । अमेरिकामा अर्थोपार्जन हुनेगरी कार्यक्रममा भाग लिनका लागि कलाकारहरुले पी क्याटेगोरीको भिसा लिनु आवश्यक छ । तर कुनै रकम नलिई निशुल्क च्यारिटीको लागि भने भिजिटर भिसामा आउनेहरुले पनि कार्यक्रम गर्न सक्छन् ।
