ज्येष्ठ नागरिकलाई तत्काल दोस्रो डोज खोपको व्यवस्था गर्न सर्वोच्चको अन्तरिम आदेश
प्रकाशित मिति : असार ८, २०७८ मंगलबार
सर्वोच्च अदालतले ६५ वर्षमाथिका ज्येष्ठ नागरिकहरुलाई तत्काल दोस्रो डोज खोप लगाउने व्यवस्था गर्न अन्तरिम आदेश जारी गरेको छ। न्यायाधीश ईश्वर खतिवडाको इजलासले सरकारका नाममा यस्तो आदेश जारी गरेको हो।
काभ्रेका ७५ वर्षीय अर्जुनराज गिरी र सुर्खेतका ६५ वर्षीय पूर्णप्रसाद पौडेलले सर्वोच्चमा सोमबार रिट दायर गरेका हुन्। उनीहरु कोरोनाविरुद्धको पहिलो डोज खोप लगाएको तर दोस्रो डोज लगाउन नपाएको भन्दै सर्वोच्च पुगेका थिए।
२०७७ फागुनमा पहिलो डोज खोप लगाएका ज्येष्ठ नागरिकले चार महिना बितिसक्दासमेत दोस्रो डोज पाउन सकेका छैनन्। पहिलो डोज खोप लगाएको १०५ दिन अर्थात् १५ हप्ता पुगिसक्दासमेत नपाएको उनीहरुको रिटमा उल्लेख गरेका थिए। आफूहरु जस्तै करिब १३ लाखभन्दा बढी ज्येष्ठ नागरिकले कोभिसिल्ड खोपको पहिलो डोज लगाएको तर दोस्रो डोज नपाएको रिटमा उल्लेख गरिएको छ।
नेपालको संविधानमा उल्लेख स्वास्थ्यसम्बन्धी मौलिक हक कार्यान्वयन गरी पाउनका लागि सार्वजनिक सरोकारको विषय लिई अदालत आएको रिटमा उल्लेख छ।
पहिलो डोज खोप लगाइ दोस्रोको पर्खाइमा रहेका दीर्घरोगी, वृद्ध, अशक्तहरु मर्कामा परेकोले तत्काल खोपको व्यवस्था गराउन माग गरिएको थियो।
सर्वोच्चले जेठ ४ गते पहिलो डोज लगाएका व्यक्तिहरुलाई दोस्रो डोज लगाउने व्यवस्था गर्नु भनि जारी भएको आदेशको समेत पालना नभएको रिटमा उल्लेख थियो।