खसोखास इन्डोर्समेन्ट: यसकारण न्युयोर्कमा नवराज केसीलाई जिताऔं
प्रकाशित मिति : असार २, २०७८ बुधबार
न्युयोर्क सिटी काउन्सिलमा डिस्ट्रिक्ट १९ बाट उम्मेदबार रहेका नवराज केसी न्युयोर्क सिटी काउन्सिलमा उम्मेदबारी दिने पहिलो नेपाली मूलका अमेरिकनमात्र होइनन्, उनको सामाजिक कार्यप्रतिको रुची र इतिहासका कारणपनि उनी जीतका लागि उपयुक्त पात्र हुन् । उनको जीतले नेपाली मूलका आप्रवासीहरुको सन्दर्भमा न्युयोर्कको सिटी काउन्सिलमा मात्र होइन, अमेरिकाको राजनीतिमा नै नयाँ इतिहास कायम हुनेछ ।
नेपालमा जन्मे हुर्केर अल्पसंख्यक आप्रवासी समुदायका रुपमा न्युयोर्कमा रहदै आएका केसीले अमेरिकन मूलधारको राजनीतिमा चालेका पाइला नेपाली आप्रवासीहरुका लागिमात्र होइन, न्युयोर्कमा रहेका विश्वभरका अल्पसंख्यक आप्रवासीहरुका लागि समेत प्रेरणा हो । उनले बनाएको यो गोरेटो आगामी पुस्ताका लागि राजमार्गमा रुपान्तरण हुनसक्छ । अमेरिकन मूल धारको राजनीतिमा अगाडि बढ्न चाहने नेपाली लगायतका अल्पसंख्यक आप्रवासीहरुका लागि उर्जा बन्नसक्छ ।
उनी अल्पसंख्यक आप्रवासी भएका कारणमात्र होइन, उनले गरेको सामाजिक योगदानका कारण पनि उनी विजयका लागि योग्य छन् । झण्डै दुईदशकदेखि सामाजिक कार्यमा सकृय उनले कोरोना महामारीबिरुद्ध जुध्न आफ्नो डिस्ट्रिक्ट १९ मामात्र होइन, छिमेकी समुदायमा समेत गरेको योगदान उल्लेखनीय रहेको छ । विगतमा रोटरी क्लब अफ न्युयोर्कका अध्यक्ष समेत रहेका उनी अहिले रोटरी डिस्ट्रिक्ट ७२५५ का सहायक गभर्नर हुन् ।
कँग्रेसवुमन ग्रेस मिङले उनले गरेको सामाजिक योगदानको सम्मानमा डिसेम्बर २२ लाई नवराज केसी डे घोषणा गरेकी थिइन् भने बु्रकलिन बोरो प्रेसिडेण्टबाट समेत केसीले कोभिड १९ हिरो अवार्ड पाएका थिए । न्युयोर्कमा रहेको नेपाली समुदायलाई अमेरिकन मुलधारको राजनीतिक नेतृत्वसँग जोड्न सेतुको काम गर्दै आएका केसी राजनीतिक एजेण्डाहरुपनि आप्रवासीको हितमा छन् ।
न्युयोर्कमा अपराध र हिंशाका घटना बढिरहेको सन्दर्भमा समुदायको सुरक्षाले केसीले पहिलो प्राथमिकतामा राखेका छन् । अपराध हुनुभन्दा अगाडि नै रोक्नका लागि समुदायसँग काम गर्ने उनको सार्वजनिक सुरक्षाको एजेण्डा निकै महत्वपूर्ण छ । युवाहरुलाई जागिर र अवशरहरुका लागि अभिवृद्धि कार्यक्रममा लगानी गर्ने, सुरक्षित सिटी निर्माणका लागि समुदाय र प्रहरीबीचको सहकार्य बढाउने लगायतका उनका एजेण्डाहरु समुदायका हितमा छन् ।
त्यस्तै साना विजनेशलाई सहयोग र शक्तिकरणका लागि विभिन्न कार्यक्रमहरु ल्याउने उनको एजेण्डा रहेको छ । अनलाइन किनमेलका कारण साना विजनेशहरु प्रभावित भइरहेको र कतिपय विजनेशहरु बन्द हुने अवस्थामा रहेकाले त्यस्ता विजनेशको ऋणमाफी लगायत भाडा नियन्त्रण लगायतका कार्यक्रमहरु उनको एजेण्डामा रहेका छन् ।
कोरोना महामारीका कारण शिक्षाक्षेत्रमा ठूलो प्रभाव परेको छ । महामारीका कारण अनलाइन कक्षामात्र हुँदा त्यसको नकारात्मक प्रभाव परेको छ भने अतिरिक्त कृयाकलाप समेत हुन पाएका छैनन् । कैयन विद्यार्थीहरु अभिभावकमा प्रविधिको ज्ञानको अभाव, साधनश्रोतको अभाव लगायतका कारण पछाडि छोडिएका छन् । उनीहरुलाई अगाडि बढाउनका लागि केसीसँग प्रविधिमा लगानी, विद्यालय भवनमा लगानी, कक्षा कोठाको स्तरबृद्धि लगायतका एजेण्डाहरु छन् । विद्यालयमा मानसिक स्वास्थ्य सम्बन्धि काम गर्ने कर्मचारीहरु पनि उपलब्ध हुनुपर्ने उनको एजेण्डा छ ।
यी र यस्ता कैयन कारणहरुले गर्दा न्युयोर्क सिटी काउन्सिलमा डिस्ट्रिक्ट १९ बाट नवराज केसीलाई जिताऔं । प्राइमरी चुनावमा जुन २० सम्म अग्रिम मतदान भइरहेको छ भने जुन २२ प्राइमरी चुनावको मुख्य दिन हो । त्यसैले तपाई डिस्ट्रिक्ट १९ को मतदाता हुनुहुन्छ भने मतदानका लागि आजै निस्कनुहोस् । यदि अन्य क्षेत्रमा बस्नुहुन्छ भने डिस्ट्रिक्ट १९ मा तपाईले चिनेको मतदातालाई मतदानका लागि प्रोत्साहन गर्नुहोस् ।
(नोट: यो इन्डोर्समेन्ट खसोखासको सम्पादकीय टिमबाट भएको हो । खसोखासको समाचार कक्ष यो भन्दा अलग हो । यो इन्डोर्समेन्टसँग समाचार कक्षको कुनै सरोकार छैन ।)