‘घरमा आगो लागिरहेको छ, हामी ठूलो बिस्तारामा को सुत्ने प्रतिस्पर्धामा छौं’
प्रकाशित मिति : जेष्ठ १७, २०७८ सोमबार
नेपाली अर्वपति विनोद चौधरीले नेपालमा कोरोना महामारी फैलिरहेको बेलामा चुनावको घोषणा गरिनु बिडम्बनापूर्ण र दुर्भाग्यपूर्ण रहेको बताएका छन् । अमेरिकन टेलिभिजन च्यानल सीनएबीसीको कार्यक्रम स्ट्रीट साइन एसियासँग कुराकानी गर्दै चौधरीले भने – ‘घरमा आगो लागिरहेको छ तर हामीभने ठूलो बिस्तारामा को सुत्ने भन्ने प्रतिस्पर्धामा छौं ।’
नेपालले कोरोना महामारीको दोश्रो लहरलाई नजरअन्दाज गरेको र यसलाई सम्बोधन गर्न प्रयासहरु अगाडि बढाउन आवश्यक रहेको चौधरीले बताएका छन् । अवस्था स्थीर नभएसम्म मुलुकमा चुनाव गर्न नहुने समेत उनले बताएका छन् । नेपालमा अप्रिलदेखि कोरोनाको दोश्रो लहर तीब्र बन्न सुरु भएको हो भने मे महिनामा नयाँ रेकर्ड कायम गरेको छ ।
कोरोनाको पहिलो छाल नै अत्यन्तै खराब रहेको र मुलुक झण्डै तीनमहिना नराम्रोसँग प्रभावित भएको उल्लेख गर्दै चौधरीले यसपटकको अवस्था असाध्यै खराब भएको बताएका छन् । चौधरी गु्रपले आफ्नो सञ्जाल परिचालन गरेर नेपालमा अक्सिजन र भेन्टिलेटर ल्याउनका लागि काम गरिरहेको उनले बताए । चौधरी ग्र्रुपको गैर नाफामुलक संस्थाले स्वास्थ्य संकटको सामना गर्नका लागि १० करोड रुपैयाभन्दा बढी दान गरेको छ ।
भ्याक्सिन वितरणको बेलामा नेपाल जस्तो देशलाई विशेष जोड दिन चौधरीले विश्वलाई आव्हान गरेका छन् । उनले भने – ‘नेपाललाई सुरक्षित र संरक्षित राख्न आवश्यक छ । नेपालको चीन र भारतसँग सिमा जोडिएको छ । समस्या एकदमै छिटो समाधान गर्न सम्भव छ ।’
सबै राजनीतिक दलहरु मिलेर कोरोना सम्बन्धित चुनौतिलाई पहिलो प्राथमिकता दिएर मुलुक सुरक्षित राख्नुपर्ने उनले बताए । मुलुकको स्वास्थ्य र आर्थिक अवस्था सही बाटोमा आइसकेपछिमात्र चुनाव गराउनुपर्ने उनको भनाई छ । यदि नेपालको लागि भ्याक्सिन र स्वास्थ्य उपकरणहरु सुरक्षित गरेको खण्डमा ६ महिनाभन्दा कम समयमा नै नेपालको स्वास्थ्य र आर्थिक अवस्था नियमित बाटोमा आउनसक्ने उनले बताए ।