१६ खर्ब ४७ अर्ब ५७ करोडको बजेट प्रस्तुत, सबैभन्दा धेरै शिक्षा क्षेत्रमा विनियोजन
प्रकाशित मिति : जेष्ठ १५, २०७८ शनिबार
सरकारले आर्थिक वर्ष २०७८/७९ का लागि १६ खर्ब ४७ अर्ब ५७ करोड रुपैयाँको बजेट ल्याएको छ।
अर्थमन्त्री विष्णुप्रसाद पौडेलले अध्यादेशमार्फत् ल्याइएको बजेट शनिबार सिंहदरबारबाट सार्वजनिक गरेका हुन्। बजेटमा चालु खर्चका लागि ६ खर्ब ७८ अर्ब र पुँजीगत (विकास) खर्चका लागि ३ खर्ब ४७ अर्ब रुपैयाँ विनियोजन गरिएको छ।
सरकारले आगामी वर्ष १० खर्ब २४ अर्ब राजस्वबाट उठाउने लक्ष्य राखेको छ। यस्तै, ६३ अर्ब ३७ करोड अनुदान आउने अनुमान गरेको छ। तीन खर्ब नौ अर्ब रुपैयाँ वैदेशिक ऋण र दुई खर्ब ५० अर्ब रुपैयाँ आन्तरिक ऋणबाट स्रोत व्यवस्थापन गर्ने लक्ष्य राखेको छ।
यसपालि सबैभन्दा धेरै शिक्षा क्षेत्रमा बजेट विनियोजन गरिएको छ। सरकारले शिक्षामा १ खर्ब ८० अर्ब रुपैयाँ बजेट छुट्याएको छ। त्यस्तै स्वास्थ्यमा १ खर्ब २२ अर्ब बजेट बिनियोजन गरिएको छ।
कोरोना खोप व्यवस्थापनका लागि २६ अर्ब २५ करोड
सरकारले कोरोना खोप व्यस्थापनका लागि २६ अर्ब २५ करोड छुट्याएको छ। बजेट प्रस्तुत गर्दै अर्थमन्त्री पौडेलले कोरोना खोप अभाव हुन नदिने बताए। उनले कोभिडविरुद्धको खोप निःशुल्क उपलब्ध गराउन पनि सरकार प्रतिबद्ध रहेको जनाए।
यस्तै, सरकारले कोभिड उपचारका लागि ३७ अर्ब ५३ करोड रुपैयाँ छुट्याएको छ। मन्त्री पौडेलले देशभरका प्रयोगशालामा कोभिडको निःशुल्क परीक्षण र उपचारको व्यवस्था गरिने जानकारी दिए।
उनले अक्सिजन प्लान्ट स्थापना गर्न, सिलिण्डर तथा ट्यांक खरिद गर्न बजेट व्यवस्थापन गरिएको बताए। यस्तै, १ सय शय्याको अस्पतालमा अनिवार्य रुपमा अक्सिजन प्लान्ट जडान गर्नुपर्ने व्यवस्था गरेको बताए।
सरकारले आइसीयू, एचडीयू तथा भेन्टिलेटरलगायतका उपकरण खरिद गर्न ४ अर्ब रुपैयाँ विनियोजन गरेको छ। प्लान्ट जडानका लागि आयात गरिने उपकरणमा भन्सार र मूल्यअभिवृद्धि करमा पूर्ण छुट दिइएको छ। यस्तै, सामुदायिक अस्पताललाई प्लान्ट जडान गर्न लागतको ५० प्रतिशत अनुदान दिइनेछ।
कोभिड महामारी अवधिभर अक्सिजन उत्पादनमा लाग्ने विद्युत महसुलमा ५० प्रतिशत छुट दिइने छ। कोभिड उपचारमा प्रयोग हुने औषधि आयातमा भन्सार छुट दिइएको छ।
यस्तै, सरकारले वृद्धभत्तामा १ हजार रुपैयाँले वृद्धि गरी ४ हजार रुपैयाँ बनाएको छ।