मेरिल्याण्डमा पारित नेपाली मुलका राज्य सांसद भण्डारीको बिलले अमेरिकामै इतिहास कायम गर्न सफल
प्रकाशित मिति : जेष्ठ १५, २०७८ शनिबार
मेरिल्याण्ड राज्यका सांसद ह्यारी भण्डारी ।
मेरिल्याण्ड राज्यको संसदबाट पारित नेपाली मुलका राज्य सांसद ह्यारी भण्डारीको विद्यालय सुरक्षा सम्बन्धि बिलले अमेरिकामै इतिहास कायम गर्न सफल भएको छ । यौन दुराचारीलाई सरकारी विद्यालयहरुमा विद्यार्थी हुनबाट रोक्ने उक्त बिलमा गभर्नर ल्यारी होगनले हस्ताक्षर गरेर कानून बनेसँगै अमेरिकामा यस्तो प्रकारको कानून ल्याउने मेरिल्याण्ड राज्य पहिलो बनेको छ ।
यो बिल पारित भएसँगै मेरिल्याण्ड राज्यभरका सरकारी विद्यालयहरुमा रहेका विद्यार्थीहरु अब अझ बढी सुरक्षित भएका छन् । खासगरी रजिस्टर्ड यौन दुराचारीहरुलाई सरकारी विद्यालयमा विद्यार्थी हुनबाट रोक्ने भण्डारीले ल्याएको यो बिल मेरिल्याण्ड राज्यको संसदबाट एकमतले पारित भएको हो । यो बिल अगाडि बढाउन डेलिगेट कार्ल ज्याक्सनले भण्डारीलाई साथ दिएका थिए ।
विगतमा यौन दुराचारीलाई पनि विद्यालय प्रशासनले भर्ना हुनका लागि विशेष स्वीकृति दिनसक्ने प्रावधान रहेको थियो । तर अब यौन दुराचारीहरुले शिक्षा लिनु परेको खण्डमा कक्षाकोठाभन्दा बाहिरको वैकल्पिक माध्यमको प्रयोग गर्नुपर्नेछ । उनीहरुलाई कक्षाकोठामा पूर्णरुपमा प्रतिबन्ध लगाइनेछ । नयाँ बिल अनुशार विद्यालयभित्र कुनै पनि यौन दुराचारीलाई जानजान छिर्न दिएको खण्डमा छिर्न दिने व्यक्तिलाई ५ हजार डलर जरिवाना र ५ बर्षसम्म जेलसजाय हुनसक्नेछ ।
दोषी ठहर भइसकेको २१ बर्षको यौन दुराचारीले बाल्टिमोरको पार्कभिल हाइस्कुलमा अध्ययन गरिरहेको पत्ता लागेपछि यो बिल अगाडि बढाइएको थियो । शिक्षक, विद्यार्थी र अभिभावकहरुलाई समेत विद्यालय प्रशासनले यौन दुराचारी विद्यालय भवनमा रहेकोबारे जानकारी दिएको थिए । प्रोजेक्ट बाल्टिमोर अनुसन्धानले यो कुरा पत्ता लगाएपछि र संचारमाध्यमहरुमा सार्वजनिक भएपछि आक्रोश बढेको थियो ।
उक्त यौन दुराचारी सान्टिनो सुडानो सन् २०१९ को डिसेम्बरमा दोश्रो पटक पक्राउ पर्नु अगाडि पार्कभिल हाइस्कुलमा अध्ययन गरिरहेको थियो । अर्को विद्यालयमा अध्ययनरत १५ बर्षकी बालिकालाई दोश्रो डिग्री बलात्कारको अभियोगमा उसलाई पक्राउ गरिएको थियो । अहिले उक्त व्यक्ति दोश्रो डिग्री बलात्कार र तेश्रो डिग्री यौन दुब्र्यबहारमा दोषी ठहर भएर जेलमा सजायको प्रतिक्षामा रहेको छ ।
हरेक बालबालिकाहरुका लागि मेरिल्याण्डका विद्यालयहरु सुरक्षित बनाउन संसदले ऐतिहासक कदम चालेको आफू गौरवान्वीत भएको भण्डारीले बताएका छन् । यो बिल मेरिल्याण्ड राज्य संसदको सिनेटमा सिनेटर क्याथे क्लसमियरबाट क्रसफाइल गरिएको थियो । भण्डारीले यो बिलमा समर्थन जुटाउनका लागि गरेको कडा मिहिनेतपछि बिल एकमतले पारित भएको हो ।