क्यालिफोर्नियामा भ्याक्सिन लगाएका २० लाखलाई कुल ११६ मिलियन डलर दिइने
प्रकाशित मिति : जेष्ठ १५, २०७८ शनिबार
क्यालिफोर्नियामा कोरोनाबिरुद्धको भ्याक्सिन लगाएका २० लाख भन्दा धेरैलाई कुल ११६ दशमलव ५ मिलियन डलर दिइने भएको छ । गभर्नर गेभिन न्युसमले घोषणा गरेको यो योजना सबैभन्दा पछिल्लो र सबैभन्दा ठूलो हो । अमेरिकनहरुलाई भ्याक्सिन लगाउन प्रोत्साहन गर्नका लागि यो योजना ल्याइएको हो ।
भ्याक्स फर द वीन नामको यो कार्यक्रम अन्तरगत कम्तीमा एकडोज भ्याक्सिन लगाएका क्यालिफोर्निया निवासीहरुमध्येबाट लोटरी गरेर १० जनालाई जनही १ दशमलव ५ मिलियन डलरका दरले पुरस्कार दिइने भएको छ । त्यस्तै ३० जनालाई ५० हजार डलरका दरले पुरस्कार दिइनेछ भने २० लाखलाई ५० डलरका दरले गिफ्ट कार्ड दिइने भएको छ ।
क्यालिफोर्नियाको कुल जनसंख्याको ५६ प्रतिशतले कम्तीमा एकडोज भ्याक्सिन लगाइसकेका छन् भने पूर्णरुपमा भ्याक्सिन प्राप्त गर्नेहरु ४२ प्रतिशतभन्दा धेरै रहेका छन् । सीडीसीको तथ्यांक अनुशार राष्ट्रिय औषत दरका तुलनामा क्यालिफोर्नियामा भ्याक्सिन लगाउनेहरु बढी रहेका छन् ।
यसै साता ओहायोमा यस्तै कार्यक्रम अन्तरगत भ्याक्सिन लगाएक सिनसिनाटी निवासी २२ बर्षका व्यक्तिले १ मिलियन डलर जितेका थिए । ओहायोले अगाडि सारेको उक्त कार्यक्रमपछि त्यहाँ भ्याक्सिन लगाउनेहरुको संख्यामा पनि उल्लेख्य बृद्धि भएको छ ।
कोलोराडोले पनि भ्याक्सिन लगाएकाहरुलाई यसैसाता एक मिलियन डलरको लोटरीको घोषणा गरेको छ । त्यस्तै ओरेगनले पनि थप १० हजार डलरको पुरस्कार सहित १ मिलियनको ज्याकपट घोषणा गरेको थियो ।
न्युयोर्कमा पनि कोरोनाबिरुद्धको भ्याक्सिन लगाउनेलाई ५ मिलियन डलर जित्नसक्ने लोटरी टिकट सित्तैमा उपलब्ध गराउने कार्यक्रम घोषणा गरिएको छ । गभर्नर एन्ड्रयु कुमोले भ्याक्सिनका लागि सर्वसाधारणहरुलाई प्रोत्साहित गर्न यो कार्यक्रम ल्याएका हुन् ।
भ्याक्स एण्ड स्क्र्याच नामको २० डलर मूल्य पर्ने लोटरी टिकट भ्याक्सिन लगाउनेहरुले सित्तैमा प्राप्त गर्न सक्ने भएका छन् । यसमा २० डलरदेखि ५ मिलियन डलरसम्मका विभिन्न पुरस्कार रकमहरु राखिएका छन् । यो लोटरीमा ९ जनामा एकजनाले कुनै न कुनै लोटरी रकम जित्ने सम्भावना रहन्छ ।
यो कार्यक्रम मे २४ सोमबारदेखि लागु हुनेछ भने मे २८ शुक्रबारसम्म जारी हुनेछ । राज्यबाट संचालित १० वटा भ्याक्सिन साइटहरुमा कोरोनाबिरुद्धको भ्याक्सिन लगाउनेहरुले यो टिकट प्राप्त गर्नेछन् । टिकट स्क्र्याच गरेर लोटरी परे नपरेको हेर्न सकिनेछ ।