दैनिक संक्रमण र मृत्यु घट्दै, ७२२६ निको भए, १०६ को मृत्यु
प्रकाशित मिति : जेष्ठ १३, २०७८ बिहीबार
नेपालमा दैनिक कोरोना संक्रमण र मृत्यु दर घट्दै गएको छ भने निको हुनेको संख्या बढ्न थालेको छ।
पछिल्लो २४ घण्टामा नेपालमा थप ६ हजार ९ सय ३९ जनामा संक्रमण पुष्टि भएको छ। स्वास्थ्य मन्त्रालयका अनुसार २० हजार ४१४ जनाको पीसीआर र ५७८ एन्टिजेन परीक्षणका क्रममा ६ हजार ९३९ जनामा संक्रमण पुष्टि भएको हो।
योसँगै नेपालमा संक्रमितको संख्या ५ लाख ४२ हजार २ सय ५६ पुगेको छ। बुधबार भने ६ हजार ७१४ जनामा संक्रमण पुष्टि भएको थियो।
त्यसैगरी, २४ घण्टामा ७ हजार २२६ जना संक्रमित निको भएका छन्। बुधबार निको हुनेको संख्या ६ हजार ७ सय १६ थियो। मन्त्रालयका अनुसार हालसम्म ४ लाख १८ हजार ८ सय २९ संक्रमणमुक्त भएका छन्।
देशभर हाल १ लाख १६ हजार ४७६ जना सक्रिय संक्रमित रहेका मन्त्रालयले जानकारी दिएको छ।
यस्तै, बिहीबार संक्रमणबाट १०६ जनाको मृत्यु भएको मन्त्रालयले जनाएको छ। बुधबार १४५ जनाको मृत्यु भएको छ। हालसम्म कोरोना संक्रमणबाट मृत्यु हुनेको संख्या ६ हजार ९५१ पुगेको छ। देशभर एक हजार ९ जना क्वारेन्टाइनमा रहेका छन्।