पूर्वसभामुखहरुको निष्कर्ष : संविधानविरुद्ध भएको आक्रमणविरुद्ध डटेर लाग्ने
प्रकाशित मिति : जेष्ठ ११, २०७८ मंगलबार
पूर्वसभामुखहरुले संविधानमाथि भएको आक्रमणका विरुद्ध डटेर लाग्ने निष्कर्ष निकालेका छन्। मंगलबार नयाँ वानेश्वरस्थित संघीय संसद भवनमा सभामुख अग्नि सापकोटाले गरेको छलफलमा पूर्वसभामुखहरुले यस्तो निष्कर्ष निकालेका हुन्।
छलफलमा पूर्वसभामुखहरु कृष्णबहादुर महरा, रामचन्द्र पौडेल, ओनसरी घर्ति, तारानाथ रानाभाट र दमननाथ ढुंगाना सहभागी थिए। रानाभाट र ढुंगानाले भने भर्चुअल रुपमा भाग लिएा थिए।
पूर्वसभामुख घर्तिले प्रतिनिधि सभामाथिको आक्रमण असंवैधानिक रहेकाले डटेर लाग्नुको विकल्प नरहेको बताइन्। ‘जनताको मतको अपमान हो। लडेर ल्याएको व्यवस्थामाथि नै धावा बोल्ने काम भएको छ, यो व्यवस्थाकै समाप्तिको झझल्को देखिने यी कार्यको घोर विरोध गरेका छौं, ‘घर्तीले भनिन्।
विघटनविरुद्धको रिटमा सर्वोच्चमा पुगिसकेकाले अब उसले छिटोभन्दा छिटो निकास दिनुपर्ने पनि आफूहरुको माग रहेको उनले बताइन्।
पूर्वसभामुख पौडेलले जेठ १५ गते सरकारले अध्यादेशबाट बजेट ल्याउने कोशिस गरिरहेको भन्दै सर्वोच्चले त्यसअघि नै संसद पुनर्स्थापना गरे संवैधानिक प्रक्रियाबाटै बजेट ल्याउन सकिने बताए। उनले छिटो भन्दा छिटो न्यायलयले फैसला दिनुपर्ने पनि बताए।