कोरोनाबिरुद्धको भ्याक्सिन लगाउने विश्वकै कम उमेरका न्युयोर्कका ८ महिनाका बालक
प्रकाशित मिति : जेष्ठ १, २०७८ शनिबार
कोरोनाबिरुद्धको भ्याक्सिन लगाउने विश्वकै कम उमेरका न्युयोर्कका ८ महिनाका बालक भएका छन् । न्युयोर्कको बाल्डविन्सभिलका ती बालकलाई फाइजर भ्याक्सिनको दोश्रो डोज पनि दिइएको छ । भिन्सेन्जो मिन्कोला नामका ती बालकलाई अपस्टेट मेलिकल युनिभर्सिटीमा भ्याक्सिनको दोश्रो डोज पनि दिइएको हो ।
अमेरिकामा अहिले ५ बर्ष मुनीका बालबालिकाहरुमा पनि फाइजर भ्याक्सिनको क्लीनिकल परीक्षण भइरहेको छ । त्यस्तो परीक्षण भइरहेका चारवटा स्थानहरुमध्ये अपस्टेट मेलिकल युनिभर्सिटी एउटा हो । अमेरिकामात्र कोरोना भ्याक्सिनको ५ बर्षमुनीका बालबालिकाहरुमा परीक्षण भइरहेको छ ।
संघीय सरकारले गत बुधबारदेखि १२ बर्षमाथिका सबैमा फाइजर भ्याक्सिन प्रयोगको अनुमति दिइसकेको छ । अब फाइजर त्योभन्दा कम उमेरका व्यक्तिमा पनि कोरोनाबिरुद्धको भ्याक्सिन परीक्षण संचालन गरेको हो ।
५ बर्ष मुनीका बालबालिकाहरुमा पहिलो चरणको भ्याक्सिन परीक्षणका क्रममा भिन्सेन्जासहित १६ जना बालबालिकाहरुलाई यो भ्याक्सिन दिइएको थियो । ६ महिनादेखि २ बर्षसम्मकाहरुलाई भ्याक्सिन परीक्षण गरिएको जनाइएको छ । भिन्सेन्जाले पहिलो डोज भ्याक्सिन भने ८ महिना पुग्नभन्दा तीनसाता अगाडि नै लिएका थिए ।
अपस्टेट मेलिकल युनिभर्सिटीमा अन्य पाँचजना बालबालिकाहरुलाई पनि भ्याक्सिन परीक्षण गरिएको छ । भिन्सेन्जोका बुबाआमा दुबैजना चिकित्सक हुन् । भिन्सेन्जालाई भ्याक्सिन लगाइसकेपछि अहिलेसम्म कुनै पनि साइड इफेक्ट नदेखिएको जनाइएको छ ।