अमेरिकन सीडीसीबाट नेपाललाई कोरोना महामारीको उच्च जोखिम भएको मुलुकमा अपग्रेड
प्रकाशित मिति : बैशाख २५, २०७८ शनिबार
अमेरिकाको रोग नियन्त्रण तथा रोकथाम केन्द्र सीडीसीले नेपाललाई कोरोना महामारीको उच्च जोखिम भएको मुलुकमा सुचीकृत गरेको छ । यसअगाडि नेपाललाई ठिक्कको जोखिम भएको देशमा सुचीकृत गरेकोमा नेपालमा कोरोना संक्रमणदर तीब्र बनेपछि सीडीसीले नेपाललाई उच्च जोखिम भएको मुलुकमा अपग्रेड गरेको हो ।
सीडीसीले जोखिमलाई ४ भागमा विभाजन गरेकोमा ८० प्रतिशत मुलुकमा उच्च जोखिम रहेको निष्कर्ष निकालेको हो । कोरोना महामारीको न्यून जोखिम रहेका देशलाई पहिलो श्रेणी, ठिक्कको जोखिम रहेका देशलाई दोश्रो श्रेणी, उच्च जोखिम रहेका देशलाई तेश्रो श्रेणी र अतिउच्च जोखिम रहेका देशलाई चौथो श्रेणीमा राखिएको छ ।
सीडीसीले भारतलाई अति उच्च जोखिम रहेको चौथो श्रेणीमा राखेकोमा नेपाललाई पनि सोही श्रेणीमा नै राखेको हो । चीनलाई भने अमेरिकन सीडीसीले जोखिम कम भएको पहिलो श्रेणीमा राखेको छ ।
अफगानिस्तान लगायत ३५ वटा देशको महामारीको अवस्था अज्ञात रहेको भन्दै ती देशहरुमा अत्यावश्यकबाहेकका यात्रा नगर्न सीडीसीले सुझाव दिएको छ । नेपालसहित जापानलाई पनि अमेरिकाले उच्च जोखिम भएको देशमा सुचीकृत गरेको छ । यसअगाडि ठिक्कको जोखिममा रहेको भन्दै सुचिकृत गरिएका ५ देशलाई उच्च जोखिम भएको मुलुकमो सुचीमा राखिएको छ ।
सीडीसीको सुची अनुशार नै अमेरिकी विदेश मन्त्रालयले भने ट्राभल एड्भाइजरी जारी गर्दै आएको छ । सोही अनुशार अमेरिकाले नेपालका सन्दर्भमा शुक्रबार ट्राभल एड्भाइजरी पनि अपडेट गरेको छ । यद्यपी विश्वब्यापी रुपमा कोरोना महामारी फैलिरहेको अवस्थामा अमेरिकी विदेशमन्त्रालयले अधिकांश मुलुकका लागि चौथो स्तरको ट्राभल एड्भाइजरी जारी गरेपनि नेपालका लागि भने तेश्रो स्तरको एड्भाइजरी जारी गरेको छ ।
अमेरिकी नागरिकलाई नेपालमा यात्रा गर्दा पुनर्विचार गर्न विदेश मन्त्रालयले सुझाव दिएको छ ।
यसैबीच बेलायतको यात्रा प्रतिबन्धको रेड लिष्टमा नेपाल पनि थपिएको छ । नेपालमा कोरोना संक्रमण तीव्र भईरहंदा बेलायतले शुक्रबार नेपालसहित टर्की र माल्दिभ्सलाई रेड लिष्टमा समावेस गरेको हो ।
यसअघि भारत, कतार र टर्की रेडलिष्टमा परेपछि नेपालसंगको हवाई सम्पर्क पनि विच्छेद जस्तै भएको छ । रेड लिष्टमा परेका मुलुकबाट बेलायत आउन प्रतिवन्ध रहनेछ । बेलायती नागरिक वा यहाँ स्थायी रुपमा बसोबास गर्नेहरुले भने कडा शर्तहरुसहित यात्रा गर्न छुट पाउनेछन् । ती यात्रुले अनिवार्य १० दिन क्वारेन्टिन बस्नुपर्नेछ र यसको खर्च १७५० पाउण्ड लाग्छ ।
त्यस अवधिमा दुई पटक पिसिआर टेस्ट गराउनु पर्नेछ । तर नतिजा नेगेटिभ आएपनि १० दिनको पूरै अवधि होटेल क्वारेन्टिनमै बिताउनुपर्नेछ ।