जुलाई ४ सम्म ७० प्रतिशत अमेरिकन बयस्कलाई भ्याक्सिन लगाउने बाइडेनको नयाँ लक्ष्य
प्रकाशित मिति : बैशाख २१, २०७८ मंगलबार
अमेरिकी राष्ट्रपति जो बाइडेनले मंगलबार कोरोनाबिरुद्धको भ्याक्सिनको नयाँ लक्ष्य तय गरेका छन् । जस अनुशार आगामी जुलाई ४ सम्म अमेरिकामा ७० प्रतिशत बयस्कहरुलाई कोरोनाबिरुद्धको भ्याक्सिन प्रदान गर्ने लक्ष्य रहेको छ ।
जुलाई ४ अमेरिकाको जन्मदिन अर्थात् स्वतन्त्रता दिवश हो । यो दिनसम्म कम्तीमा ७० प्रतिशत अमेरिकनहरुलाई कम्तीमा एकडोज भ्याक्सिन उपलब्ध गराउने बाइडेन प्रशासनले नयाँ लक्ष्य तय गरेको हो । अहिले अमेरिकामा भ्याक्सिनको माग केही घटेको छ भने केही राज्यहरुले आफ्नालागि उपलब्ध आधा भन्दा धेरै भ्याक्सिन मगाएका छैनन् ।
तपाईको कोरोनासंक्रमणबाट सिकिस्त बिरामी हुने सम्भावना कम भएपनि तपाईले कोरोनाबिरुद्धको भ्याक्सिन लिनुपर्छ । यसलाई तपाईको जीवन र तपाईका प्रियजनहरुको जीवन बचाउनसक्छ । त्यसैले किन जोखिम उठाउनुहुन्छ? बाइडेनले ह्वाइटहाउसबाट भने ।
बाइडेनको लक्ष्य जुलाई ४ सम्म कम्तीमा १८१ मिलियन अमेरिकन बयस्कहरुलाई एउटामात्र डोज भएपनि प्रदान गर्नु रहेको छ । साथै १६० मिलियन बयस्कलाई पूर्णरुपमा भ्याक्सिन प्रदान गर्नु रहेको छ । अमेरिकामा ५६ प्रतिशतभन्दा बढी बयस्कहरुले कोरोनाबिरुद्धको भ्याक्सिन लगाइसकेका छन् ।
अमेरिकामा कुल १०६ मिलियनभन्दा बढीले पूर्णरुपमा कोरोनाबिरुद्धको भ्याक्सिन लगाइसकेका छन् । कोरोनाबिरुद्धको भ्याक्सिन लगाउने ६५ बर्षमाथिको जनसंख्या ८२ दशमलव ९ प्रतिशत रहेको छ । पूर्णरुपमा भ्याक्सिन लगाइसकेको यो जनसंख्या ६९ दशमलव ८ प्रतिशत रहेको छ ।
अहिले अमेरिकाले औषतमा हरेक दिन झण्डै १० लाख डोज भ्याक्सिनको पहिलो डोज लगाइरहेको छ । तीनसाता अगाडिको तुलनामा यो दर झण्डै आधाले कम हो । अमेरिकामा १२ बर्षमाथिकाहरुलाई भ्याक्सिन लगाउनका लागि फाइजरले आवेदन दिइसकेको छ ।