अमेरिकामा बयस्कहरुलाई धमाधम भ्याक्सिन, बालबालिकाहरु संक्रमित दर २२ प्रतिशत
अमेरिकामा बयस्कहरुले धमाधम भ्याक्सिन लगाइरहँदा बालबालिकाहरुमा भने कोरोना संक्रमण दर उच्च देखिएको छ । पछिल्लो तथ्यांक अनुशार कुल संक्रमितहरुमध्ये झण्डै २२ प्रतिशत बालबालिकाहरु रहेका छन् । जनवरीसम्म अमेरिकामा संक्रमित हुने बालबालिकाहरुको संख्या अत्यन्तै कम रहेको थियो ।
एकबर्ष अगाडि कुल संक्रमितहरुमध्ये बालबालिकाहरु ३ प्रतिशतमात्र रहेकोमा गत साताको तथ्यांक हेर्दा कुल संक्रमित मध्ये २२ दशमलव ४ प्रतिशत बालबालिकाहरु रहेका छन् । गतसाता अमेरिकामा ३ लाख १८ हजार ६ सय १ जना नयाँ संक्रमित थपिदा बालबालिकाहरु ७१ हजार ६ सय ४९ जना रहेका छन् ।
अमेरिकामा १६ बर्षभन्दा माथिकाहरुले धमाधम भ्याक्सिन लगाएपनि बालबालिकाहरुका लागि भ्याक्सिन उपलब्ध नहुँदा उनीहरुको संक्रमणको जोखिम समुहमा परेका छन् । कोरोनाको नयाँ प्रकारका बाबजुत विद्यालयका गतिविधि खुला गरिएका कारणपनि बालबालिकाहरुमा संक्रमण बढेको विश्लेषण गरिएको छ ।
अहिलेसम्मको तथ्यांक हेर्दा भने गतबर्षदेखि अहिलेसम्म कुल संक्रमितमा ४ बर्षसम्मका बालबालिकाहरु २ दशमलव १ प्रतिशत र ५ देखि १७ बर्षसम्मकाहरु १० दशमलव १ प्रतिशत रहेका छन् । अमेरिकामा १७ बर्ष मुनीका संक्रमण पुष्टी हुनेहरुको कुल संख्या झण्डै ३१ लाख रहेको छ ।
सीडीसीको पछिल्लो तथ्यांक अनुशार अमेरिकामा सबैभन्दा बढी संक्रमित हुने उमेर समुह १८ बर्षदेखि २९ बर्षसम्मका छन् । कुल संक्रमितमध्ये २२ दशमलव ५ प्रतिशत संक्रमित यो उमेर समुहका रहेको तथ्यांकमा उल्लेख छ । अहिलेसम्म यो उमेरसमुहका ५७ लाख २९ हजार २ सय ३८ जनामा कोरोना संक्रमण पुष्टी भइसकेको छ ।
अमेरिकामा अहिलेसम्म २४७ मिलियन डोज भ्याक्सिन लगाइसकिएको छ । १८ बर्षमाथिको कुल जनसंख्याको ५६ दशमलव ३ प्रतिशतले भ्याक्सिन लगाइसकेको छ भने कुल जनसंख्याको ४४ दशमलव ४ प्रतिशतले भ्याक्सिन लगाएका छन् । ६५ बर्षमाथिका ८२ दशमलव ८ प्रतिशतले कोरोनाबिरुद्धको भ्याक्सिन लगाइसकेका छन् ।
