शंकर पोखरेल पुनः मुख्यमन्त्री नियुक्त
प्रकाशित मिति : बैशाख १९, २०७८ आईतबार
लुम्बिनी प्रदेश मुख्यमन्त्रीमा शंकर पोखरेल पुनःनियुक्त भएका छन्। प्रदेश प्रमुख धर्मनाथ यादवले पोखरेललाई नेपालको संविधानकोधारा १६८ को उपधारा १ बमोजिम मुख्यमन्त्रीमा नियुक्त गरेका हुन्।
लुम्बिनी प्रदेश प्रमुख कार्यालयका प्रवक्ता चिरञ्जिवी पौडेलका अनुसार पोखरेललाई संविधानको धारा १६८ (१) अनुसार मुख्यमन्त्रीमा नियुक्त गरिएको हो।
‘नेपाल कम्युनिस्ट पार्टी (एमाले) संसदीय दलका नेता शंकर पोखरेलज्यूले आफ्नो नेतृत्वमा नेपालका संविधानको धारा १६८ (१) बमोजिम सरकार गठन गर्न प्रदेशसभाका बहुमत सदस्यहरूको हस्ताक्षरसहित माननीय प्रदेश प्रमुखसमक्ष दावी पेश गर्नुभएको थियो,’ प्रदेश प्रमुख कार्यालयले जारी गरेको विज्ञप्तिमा भनिएको छ।
यसअघि आफूविरुद्ध दर्ता भएको अविश्वास प्रस्तावमाथि छलफल गर्न प्रदेश सभाको विशेष अधिवेशन बोलाइएको दिन आइतबार नै पोखरेलले राजीनामा दिएका थिए। बैठकमा अविश्वासको प्रस्ताव पेश हुने कार्यसूची थियो। पोखरेलले आइतबार नै प्रदेश सभा अधिवेशन अन्त्य गरिसकेका छन्।