बेरोजगारी विमा रकम बढी गएको भन्दै फिर्ता गर्न सन्देश, फिर्ता गर्नु नपर्नेहरुलाई आएपछि अन्यौल
शुक्रबार दिउसो न्युयोर्क लेबर डिपार्टमेन्टले बेरोजगारी विमा रकम लिइरहेका कैयनलाई सन्देश पठायो, जसमा बढी रकम पठाइएको भन्दै फिर्ता गर्न भनिएको थियो । तर बढी रकम नलिएकाहरुले पनि आफूहरुलाई उक्त सन्देश आएको भन्दै आक्रोश र अन्यौल व्यक्त गरेका छन् ।
न्युयोर्क डिपार्टमेन्ट अफ लेवरका तर्फबाट पठाइएको उक्त सन्देशमा भनिएको छ – ‘न्युयोर्कबासीहरुले उनीहरु योग्य भएको सुविधा रकम प्राप्त गरिरहेको निश्चित गर्नका लागि हाम्रो रेकर्ड पुनरावलोकन गर्दा हामीले तपाईको एकाउन्टमा ओभरपेमेन्ट भएको पत्ता लगाएका छौं । यो डुप्लीकेट पेमेन्ट न्युयोर्कबासीलाई छिटो भन्दा छिटो सुविधा रकम उपलब्ध गराउने क्रममा भएको हो । तर संघीय कानून अनुशार न्युयोर्क डिपार्टमेन्ट अफ लेवरले ओभरपेमेन्ट रकम फिर्ता लिन जरुरी हुन्छ ।’
न्युयोर्क डिपार्टमेन्ट अफ लेबरबाट यस्तो सन्देश आएपनि बेरोजगारी विमा रकम लिएका न्युयोर्कबासीहरु आत्तिएका छन् । आफूहरुले बढी रकम पठाइएको सन्देश पाएपनि कुनै बढी रकम नपाएको उनीहरुले बताएका छन् ।
न्युयोर्क डिपार्टमेन्ट अफ लेबरले भने गतबर्षको अप्रिल र मे महिनामा बेरोजगारी विमा रकम लिइरहेकाहरुले सानो रकम डुप्लीकेट पेमेन्टका रुपमा बढी पाएको बताएको छ । यदि कसैले बढी रकम पाएको भएमा थप सुचनासहित पत्र प्राप्त गर्ने डिपार्टमेन्ट अफ लेबरको भनाई छ । पत्रमा आर्थिक समस्याका कारण उक्त रकम मिनाहा वा छुटका लागि कसरी अनुरोध गर्ने भन्ने तरिका समेत उपलब्ध हुनेछ ।
यदि उक्त रकममा छुटको अनुरोध गर्न चाहेको खण्डमा डकुसाइनमार्फत इमेल फर्म प्राप्त हुने जनाइएको छ । उक्त फर्म भरेर छुटको अनुरोध गर्न सकिनेछ । यदि डकुसाइनमा फर्म प्राप्त नभएमा अप्रिल २३ देखि लागु हुनेगरी छुटका लागि वेभर आवेदन अनलाइनबाटै दिन सकिने जनाइएको छ ।
समयमै छुटका लागि दिइएका आवेदनका सन्दर्भमा न्युयोर्क डिपार्टमेन्ट अफ लेबरले ३० दिनपछि पेमेन्ट रिकभर गर्न सुरु गर्ने जनाइएको छ । तर बढी तिरिएको रकम रिकभर नहुँदासम्म सबै बेरोजगारी सुविधा रकम २० प्रतिशतले घटाइने न्युयोर्क डिपार्टमेन्ट अफ लेवरको भनाई छ ।
कतिपयले अप्रिल महिनामा ६ सय डलर अतिरिक्त रकम पाएका थिए । उक्त रकम पाएकाहरुले त्यो रकम फिर्ता गर्न वा छुटका लागि आग्रह गर्नसक्नेछन् ।
