टेक्सासमा मारिएका व्यक्ति पोखराका रमेश थापा, आक्रमणकारी पक्राउ, १० लाख डलर धरौटी तय
प्रकाशित मिति : चैत्र २६, २०७७ बिहीबार
टेक्सासमा एकजना नेपाली रमेश थापालाई गोली हानेर हत्या गर्ने व्यक्तिलाई प्रहरीले पक्राउ गरेको छ । २२ बर्षको फ्रान्सिस ओनियललाई बुधबार बेलुका साउथ इस्ट अष्टिनबाट पक्राउ गरेको प्रहरीले जनाएको छ ।
उक्त व्यक्तिलाई पहिलो डिग्री हत्या र दोश्रो डिग्री खतरनाक हतियारबाट आक्रमण गरेको अभियोग लगाइएको बिहिबार युएस मार्शलले जनाएको छ । मंगलबार राती उक्त व्यक्तिले ब्लफ स्प्रींग रोडमा रहेको कन्कर्ड अपार्टमेन्टमा पोखराका ३९ बर्षीय रमेश थापालाई गोली हानी हत्या गरेको थियो ।
अष्टिन प्रहरीले मारिएका व्यक्ति नेपाली रमेश थापा भएको बिहिबारमात्र सार्वजनिक गरेको हो । कम्प्लेक्सको पार्किङ लटमा थापामाथि आक्रमण भएको थियो । त्यसपछि लगत्तै घटनास्थलमा आपतकालिन टिम पुगेर बचाउने प्रयास गरेपनि बचाउन नसकिएपछि उनलाई घटनास्थलमा नै मृत घोषणा गरिएको थियो ।
घटनास्थलबाट आक्रमणकारी सेतो सेडानमा चढेर फरार भएको थियो । आक्रमणकारीले अप्रिल ५ मा पनि माक्र्वीस पार्कसाइड अपार्टमेन्टमा गोली चलाएको जनाइएको छ । घटनास्थलबाट भागेपछि बुधबार प्रहरीले आक्रमणकारीका नाममा पक्राउ वारेन्ट जारी गरेको थियो ।
आक्रमणकारीको धरौटी १० लाख डलर तय गरिएको छ । जसमध्ये साढे ७ लाख डलर हत्या र साढे २ लाख डलर आक्रमणको अभियोगमा रहेको छ । आक्रमणकारीलाई ट्राभिस काउन्टी जेलमा राखिएको छ ।
पोखरा महानगरपालिदका १८ सराङकोट पंदेली स्थायी घर घएका थापा ११ बर्षदेखि टेक्सासको अस्टिनमा बस्दै आएका थिए । कामबाट घर फर्किदै गर्ने क्रममा आफ्नै अपार्टमेन्टको पार्किङ लटमा उनीमाथि गोली हानिएको थियो । थापाका श्रीमति र १३ बर्षका छोरा नेपालमा रहेका छन् ।
दाहसंस्कार र परिवारको सहयोगका लागि ग्रेटर अष्टिन नेपाली सोसाइटीका तर्फबाट गोफण्डमीमा अभियान संचालन गरिएको छ । २५ हजार डलरको लक्ष्यसहित सुरु अभियानमा यो समाचार तयार पार्दासम्म ९ हजार २ सय डलर संकलन भएको छ ।
तपाईपनि सहयोग गर्न चाहनुहुन्छ भने यहाँ क्लीक गर्नुहोला ।