नेपाल–खनाल समूहले घोषणा गर्‍यो बागमती प्रदेशमा समानान्तर कमिटी (सूचीसहित)


प्रकाशित मिति : चैत्र २४, २०७७ मंगलबार

नेकपा एमालेको माधवकुमार नेपाल-झलनाथ खनाल समूहले बागमती प्रदेशमा समानान्तर कमिटी घोषणा गरेको छ। मंगलबार काठमाडौंमा बसेको बैठकले अष्टलक्ष्मी शाक्यको संयोजकत्वमा १७५ सदस्यीय बागमती प्रदेश कमिटी घोषणा गरेको हो।

कमिटीका सहसंयोजकमा केदार न्यौपाने र पशुपति चौलागाईं चयन भएका छन्। त्यस्तै, सचिवमा रचना खड्का चयन भएकी छिन्।

समानान्तर कमिटी गठनलाई तीव्रता दिएको यो समूहले बागमतीका १३ जिल्लामा समानान्तर कमिटी घोषणा गरेको छ।

यसअघि यो समूहले महिला संघ, युवा संघ, अखिल, खेलकुद महासंघ, उत्पीडित जातीय मुक्ति समाजलगायत जनवर्गीय संगठनमा समानान्तर केन्द्रीय कमिटी गठन गरिसकेको छ।

ओलीलाई जसले त्वम्शरणम् गर्छ, उसैले मात्र अवसर पाउँछ : माधव नेपाल
यसैबीच, सो बैठकलाई सम्बोधन गर्दै नेता माधवकुमार नेपालले केपी ओलीलाई जसले त्वम्शरणम् गर्छ उसैले मात्र अवसर पाउने बताएका छन्। उनले ओलीविरुद्ध दृढताका साथ उभिन पनि आग्रह गरे।

‘ओलीको टाङमुनि छिर्ने, आत्मसमर्पण गर्ने हो भने बेग्लै कुरा, पार्टी द्वन्द्वबाट आत्तिएर निरशा हुने हो भने बेग्लै कुरा, होइन भने दृढताका साथ उभिनुपर्छ, आन्दोलनमा होमिनुपर्छ,’ उनले भने।

उनले ओली नेतृत्वको एमालेलाई निर्वाचन आयोगले वैधानिकता दियो भने के गर्ने भनेर नआत्तिन पनि कार्यकर्तालाई आग्रह गरे। ‘ओली नेतृत्वको पार्टीलाई निर्वाचन आयोगले वैधानिक भन्यो भने के गर्ने भनेर आत्तिइरहनु भएको होला, नआत्तिनुस्, हामी समाधान निकाल्ने छौं, मझधारमा छाड्ने छैनौं, डुंगालाई सफलताका साथ लक्ष्यसम्म पु¥याई छाड्नेछौं,’ उनले भने।

नेता नेपालले जिल्ला तथा प्रदेशमा पनि कमिटी गठन जारी रहेको उल्लेख गर्दै जिल्लाभन्दा तलका तहमा पनि कमिटी बनाउने बताए।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com