जलवायु परिवर्तनबारे अमेरिकाले गर्ने शिखर बैठकमा नेपालले पाएन निम्तो
प्रकाशित मिति : चैत्र २३, २०७७ सोमबार
अमेरिकाले यसै महिना गर्ने ४० वटा राष्ट्रका शीर्ष नेता सम्मिलित जलवायु शिखर सम्मेलनमा सगरमाथाको देश नेपालले भने निम्तो पाएको छैन । हिमाली क्षेत्रमा जलवायु परिवर्तनको असर तीब्र भएपनि नेपाललाई भने यो सम्मेलनमा निम्तो दिइएको छैन ।
अमेरिकी राष्ट्रपति जो बाइडनले भर्चुअल तरिकाले गर्ने सम्मेलनमा दक्षिण एशियाका तीन देशका शीर्षस्थ नेताहरूलाई निम्तो गरिएपनि नेपाललाई भने वेवास्ता गरिएको छ । अप्रिल २२ र २३ मा हुने शिखर बैठकमा भारतसहित बाङ्ग्लादेश र भुटानका शीर्षस्थ नेताहरूलाई भने निम्ता दिइएको छ ।
नेपाल क्षेत्रीय स्तरमा जलवायु परिवर्तन नियन्त्रणमा आफ्नो भूमिका देखाउन विफल भइरहेकाले यस्तो अवस्था आएको हुनसक्ने विज्ञहरुको भनाई छ । जनवरी २० मा सपथ ग्रहण गरेका अमेरिकी राष्ट्रपति जो बाइडेनले जलवायु परिवर्तनको विषयलाई प्राथमिकतामा राख्दै आएका छन् ।