नेपाल–खनाल समूहले गठन गर्यो समानान्तर काठमाडौं कमिटी
प्रकाशित मिति : चैत्र २२, २०७७ आईतबार
समानान्तर कमिटी गठनलाई तिब्रता दिने क्रममा नेकपा एमालेको नेपाल–खनाल समूहले काठमाडौं कमिटीको घोषणा गरेको छ। समूहले आइतबार एक कार्यक्रमका वसन्त मानन्धरको अध्यक्षतामा २२५ सदस्यीय काठमाडौं कमिटीको घोषणा गरेको हो।
मानन्धर प्रदेशसभा सदस्य पनि हुन्। कमिटीको उपाध्यक्षमा शोभा सापकोटा, सचिवमा कुसुम कार्की र उपसचिवमा एलपी श्रेष्ठ छन्।
काठमाडौं जिल्ला कमिटीद्वारा आयोजित अगुवा कार्यकर्ता भेला नाम दिइएको कार्यक्रमबीच समानान्तर कमिटी गठन गरिएको हो।
ओलीले चाहँदैमा फ्यालिन्नौं : माधव नेपाल
भेलालाई सम्बोधन गर्दै वरिष्ठ नेता माधवकुमार नेपालले पार्टी अध्यक्ष केपी शर्मा ओलीले चाहँदैमा आफूहरू नफ्यालिने दावी गरे। उनले ओलीले लगाउने फूर्तिबाट कोही नडराउनेसमेत बताए।
‘केपी ओलीले फ्यालेर हामी फ्यालिने मान्छे हौं?,’ नेपालले भने, ‘हामीले एमाले निर्माण गरेका हौं, राष्ट्रिय राजनीतिमा भूमिका निर्वाह गरेका मान्छे हौं। त्यसैले ओलीको फूर्तिको कुनै काम छैन।’
केन्द्रीय कमिटीदेखि सचिावलयसम्म आफूहरूको बहुमत रहेको दावी गर्दै नेता नेपालले आफूहरूको पार्टी आधिकारिक एमाले रहेको जिकिर गरे। उनले वामदेवसमेत आफ्नो समूहमा आउने दाबी गर्दै त्यसपछि आफूहरु थप बलियो हुने बताए।
नेपालले ओलीले गुटको भेलाबाट गरेको निर्णय आफूहरुलाई मान्य नहुने पनि बताए। अध्यक्ष ओली सुरूदेखि गुटबन्दीमा लागेको आरोप लगाउँदै उनले गुटबन्दीकै कारण ओलीले पार्टीलाई धरासायी बनाएको बताए।